ARA|Il-Prim Ministru Robert Abela u Lydia Abela jivvutaw fiż-Żejtun

Il-Prim Ministru Robert Abela u martu Lydia Abela tefgħu l-vot tagħhom fiż-Żejtun is-Sibt filgħodu, hekk kif il-votanti madwar Malta u Għawdex qed jiddeċiedu min se jmexxi lill-pajjiż fil-ħames snin li ġejjin.

Qabel daħlu fil-post tal-votazzjoni, il-koppja Abela sellmet lill-votanti li kienu miġbura barra l-iskola.

Wara li tefa’ l-vot tiegħu, il-Prim Ministru rringrazzja lill-elettorat u lill-midja għas-sehem tagħhom matul il-kampanja elettorali.

Abela kien milqugħ ukoll mill-Kummissarju Elettorali Ewlieni Joseph Camilleri, li lilu rringrazzjah għall-ħidma tal-Kummissjoni Elettorali matul il-proċess elettorali.

Il-vot tal-Prim Ministru jasal wara ġimgħat ta’ kampanja intensa li rat lill-Partit Laburista jitlob mandat ieħor biex ikompli jmexxi lill-pajjiż.