Il-Partit Laburista akkuża lill-Kap tal-Partit Nazzjonalista Alex Borg li m’għandux “idea kif jaħdmu l-finanzi tal-pajjiż” u li qed jagħmel “gideb sfaċċat” dwar id-dejn nazzjonali.
Fi stqarrija maħruġa nhar il-Ħamis, il-PL qal li Borg żbalja meta sostna li l-Gvern żied id-dejn b’€1 biljun bejn Marzu u April tal-2026.
“Jekk kellna bżonn konferma li Alex Borg ma jafx x’inhu fiscal forecast, issa għandna,” qal il-PL.
“Borg jew ma jifhimx lanqas il-bażi tal-finanzi pubbliċi, jew inkella reġa’ qed jigdeb.”
Dan wara li Borg, waqt attività politika fin-Naxxar nhar l-Erbgħa, akkuża lill-Gvern li qed jipprova jaħbi ċ-ċifri reali tad-dejn nazzjonali.
Il-Kap tal-PN kien sostna li statistika tal-Bank Ċentrali Ewropew uriet li l-Gvern issellef €1 biljun bejn Marzu u April biss.
Borg kien ukoll allega li l-Uffiċċju Nazzjonali tal-Istatistika naqas milli jippubblika ċifri aġġornati dwar id-dejn taħt id-direzzjoni tal-Ministru tal-Finanzi Clyde Caruana.
Skont il-PL, Borg kien qed jikkwota statistika tal-Bank Ċentrali Ewropew dwar government debt securities fuq bażi mhux konsolidata.
“Skont Borg, din hija l-miżura tad-dejn nazzjonali,” qal il-PL.
“Dak li ma ndunax bih huwa li din hija miżura mhux konsolidata, u kif tispeċifika Eurostat, il-miżura tad-dejn trid tkun konsolidata.”
Il-partit spjega li biex jiġi determinat l-obbligu reali tal-ħlasijiet tal-Gvern, id-dejn irid jiġi kkonsolidat u jitnaqqsu ammonti li jinsabu taħt il-kontroll tal-Gvern stess.
Il-PL akkuża wkoll lil Borg li qed jigdeb meta qal li l-Gvern ta struzzjonijiet lill-NSO biex ma tippubblikax statistika dwar il-Fond Konsolidat għal April.
Skont il-partit, id-deċiżjoni tal-NSO kienet waħda indipendenti u ttieħdet taħt Artiklu 114(1) tal-Kap 354 tal-liġi elettorali.
Il-partit qal li dan l-artiklu jipprojbixxi l-pubblikazzjoni ta’ materjal li jista’ jinfluwenza lill-votanti waqt jum ir-riflessjoni.
Il-PL insista li l-Gvern ma kellu ebda involviment fid-deċiżjoni.
Il-kontroversja dwar id-dejn u l-istatistika ekonomiċi żiedet mat-tensjoni politika fl-aħħar sigħat tal-kampanja elettorali, hekk kif iż-żewġ partiti qed jiskambjaw akkużi dwar il-finanzi pubbliċi u t-trasparenza.
