Il-Partit Laburista akkuża lill-Partit Nazzjonalista li bbaża l-proposta tiegħu dwar il-mass rapid transport fuq preżentazzjoni preliminari li kienet ġiet ippreparata minn PricewaterhouseCoopers (PwC) għall-Gvern fl-2023.
L-akkuża saret wara li MaltaToday żvelat kif studju kunfidenzjali kkummissjonat minn Infrastructure Malta kien ikkonkluda li sistema ta’ metro tista’ titlesta fi ftit aktar minn ħames snin.
Fi stqarrija maħruġa t-Tlieta waranofsinhar, il-PL qal li l-PN ammetta li ma wettaqx studji tekniċi tiegħu stess u minflok ibbaża ruħu fuq preżentazzjoni preparata minn PwC f’Mejju tal-2023.
Skont il-Partit Laburista, din il-preżentazzjoni kienet ġiet sottomessa lill-Ministru tat-Trasport fid-19 ta’ Mejju tal-2023 iżda sussegwentement ġiet abbandunata wara aktar konsultazzjonijiet ma’ esperti u evalwazzjonijiet tekniċi oħra.
Il-PL sostna li l-proposta tal-PN hija bbażata fuq “presentation preliminari” u mhux fuq studji finali jew pjan approvat mill-Gvern.
Ir-rapport, magħruf bħala Project Hestia, kien evalwa l-pjan oriġinali tal-Gvern għal tliet linji ta’ metro mfassla mill-konsulenti internazzjonali Arup.
L-istudju kien jistma li netwerk ta’ 29 kilometru maqsum fuq tliet linji — Red, Blue u Green — seta’ jitlesta fi 5.3 snin. Ir-rotot kienu jkopru prinċipalment iż-żoni ċentrali u tal-Lvant ta’ Malta.
Il-Partit Laburista qal li wara dak l-istadju preliminari, il-Gvern kompla b’aktar studji u reviżjonijiet qabel ma beda jaħdem fuq il-pjan il-ġdid tiegħu dwar il-mobilità.
Aktar kmieni dan ix-xahar, il-PN nieda uffiċjalment il-proposta tiegħu għal sistema ta’ metro taħt l-art li tgħaqqad l-Ajruport ma’ Pembroke permezz ta’ Ħal Qormi, iż-żona tal-Università, il-Gżira, Tas-Sliema u San Ġiljan.
Il-Partit Nazzjonalista qal li l-ewwel linja tal-proġett tkun twila 11.5 kilometru u tkun tista’ titlesta fi żmien ħames snin, b’investiment stmat ta’ €1.4 biljun.
Il-proposta kienet immedjatament qajmet dibattitu politiku, bil-PL jiddubita kemm it-timeline kif ukoll il-fattibbiltà finanzjarja tagħha.
Madankollu, MaltaToday żvelat ukoll li l-istudju kkummissjonat mill-Gvern kien qed jippreżenta timelines simili għal sistema ta’ metro operattiva.
Tul l-aħħar xhur, kemm il-Gvern kif ukoll il-PN skambjaw kritika fuq il-proposti tagħhom relatati mat-trasport pubbliku u l-mass transport.
Filwaqt li l-PN kien iddeskriva l-pjan tal-Gvern bħala “wegħda tas-silly season”, il-Gvern issa qed jakkuża lill-Oppożizzjoni li bbażat il-proposta tagħha fuq dokument preliminari li qatt ma ġie adottat uffiċjalment.
