Momentum jirrapporta aktar serq ta’ banners elettorali f’San Ġiljan

Momentum qal li banners elettorali oħra tal-partit insterqu minn San Ġiljan, hekk kif il-partit irrappurta t-tieni inċident simili fi żmien jumejn biss.

Fi stqarrija maħruġa ftit jiem qabel l-elezzjoni, Momentum qal li t-tneħħija ripetuta ta’ materjal elettorali hija “inaċċettabbli” u qed timmina l-proċess demokratiku kif ukoll id-dritt tal-partiti politiċi li jagħmlu kampanja b’mod liberu u paċifiku.

Il-partit sostna li intimidazzjoni politika u vandaliżmu “m’għandhomx post f’soċjetà demokratika”.

Momentum appella lill-awtoritajiet biex jieħdu azzjoni immedjata u jinvestigaw dawn l-inċidenti b’mod serju.

Il-partit irrimarka li fiż-żona hemm cameras tas-CCTV pubbliċi u qal li jistenna li l-awtoritajiet jidentifikaw lil dawk responsabbli “mingħajr dewmien”.

Dan huwa l-aħħar episodju f’sensiela ta’ inċidenti relatati mal-banners tal-kampanja ta’ Momentum matul din il-kampanja elettorali.

Nhar il-Ħadd, banners elettorali tal-kandidat u Segretarju Ġenerali tal-partit Mark Philip Camilleri Gambin insterqu minn Marsaskala.

Aktar kmieni din is-sena, f’April, banner elettorali ieħor ta’ Momentum kien tneħħa mid-Dipartiment tat-Tindif ftit wara li twaħħal fuq il-pont ta’ Santa Venera.