Il-Partit Laburista wiegħed li, jekk jerġa’ jkun fil-Gvern, se jintroduċi riforma sabiex ebda żvilupp ma jkun jista’ jibda waqt li permess tal-ippjanar ikun għadu taħt appell.
Il-proposta tħabbret bħala parti mill-manifest elettorali “Int Malta”, fejn il-partit qal li wieħed mill-għanijiet ewlenin tiegħu fis-settur tal-ippjanar huwa li jinħoloq proċess “ġust u prevedibbli għal kulħadd”.
Skont il-PL, ir-riforma għandha l-għan li tindirizza sitwazzjonijiet fejn żviluppi jibdew minkejja li l-proċess legali dwar il-permess ikun għadu mhux konkluż.
Il-proposta tiġi fi sfond ta’ dibattitu kontinwu dwar is-sistema tal-appelli tal-ippjanar u każijiet fejn proġetti komplew jinbnew minkejja oġġezzjonijiet pendenti jew proċeduri quddiem it-tribunali.
Il-Partit Laburista qal ukoll li jrid aktar ċertezza kemm għar-residenti kif ukoll għall-iżviluppaturi, filwaqt li sostna li s-sistema attwali kultant twassal għal inċertezza u kunflitti bejn il-partijiet involuti.
Il-proposta dwar l-appelli tifforma parti minn pakkett usa’ ta’ miżuri relatati mal-ippjanar, l-ambjent u l-infrastruttura li l-partit ilu jħabbar matul il-kampanja elettorali.
Fost dawn hemm ukoll wegħdiet dwar aktar protezzjoni ta’ spazji miftuħa u parks pubbliċi, kif ukoll miżuri relatati mal-enerġija u sostenibbiltà ambjentali.
Il-kwistjoni tal-iżvilupp waqt appell ilha tiġi diskussa għal snin, b’għaqdiet ambjentali u residenti jisħqu li xogħlijiet li jibdew qabel ma jintemmu l-proċeduri legali jistgħu joħolqu sitwazzjonijiet irreversibbli anke jekk il-permess eventwalment jiġi revokat
