Il-Prim Ministru Robert Abela qal li Gvern Laburista ġdid se jagħti prijorità lis-saħħa tan-nisa permezz tal-ħolqien ta’ klinika speċjalizzata.
Abela kien qed jindirizza attività tal-kampanja elettorali organizzata minn Nisa Laburisti fil-Furjana nhar l-Erbgħa filgħaxija, li ffukat fuq l-isfidi li jaffaċċjaw in-nisa.
Il-Prim Ministru qal li l-klinika se tkun dedikata għal check-ups ġinekoloġiċi u preskrizzjonijiet ta’ kontraċettivi.
Huwa ħabbar ukoll li Gvern Laburista ġdid se jipprovdi mingħajr ħlas il-mediċini għall-kura tal-endometriosis u hormone replacement therapy.
Abela wiegħed ukoll li jerġa’ jressaq emendi legali li kienu bdew jiġu diskussi fil-Parlament qabel ix-xoljiment tiegħu, immirati biex jiġġieldu image-based abuse, inklużi deepfakes.
Huwa qal ukoll li l-pulizija se jkollhom rwol aktar proattiv fid-dinja ċibernetika permezz ta’ online patrols biex jipproteġu lit-tfal u persuni vulnerabbli mill-abbuż.
Il-mexxej Laburista ħabbar ukoll li se jittieħdu miżuri biex vittmi ta’ vjolenza domestika jkunu jistgħu jixhdu permezz ta’ video conference waqt kawżi fil-qorti.
Fuq livell kulturali, Abela qal li fil-leġiżlatura li jmiss artisti se jingħataw taħriġ fin-negozju, inkluż gwida dwar il-finanzi, il-marketing, il-prezzijiet u l-qafas legali.
Huwa ħabbar ukoll li Gvern Laburista ġdid se joħloq pakkett ta’ inizjattivi biex jgħin artistic u creative start-ups.
Abela qal ukoll li se jitwaqqaf digital lab biex jagħti aktar appoġġ lil digital creators sabiex ikunu jistgħu jiżviluppaw il-kreattività u l-ideat tagħhom b’mod aktar olistiku.
