L-eks sindku Laburista tal-Gżira Conrad Borg Manche se jikkontesta l-elezzjoni ġenerali li jmiss bħala kandidat tal-Partit Nazzjonalista.
Sorsi infurmaw li Borg Manche se jikkontesta fuq il-ħames u l-għaxar distrett elettorali, b’dan tal-aħħar jinkludi wkoll il-lokalità tal-Gżira minn fejn ġej.
Borg Manche kien wieħed mis-sindki Laburisti l-aktar vokali qabel ma beda jitbiegħed mill-partit u eventwalment irreżenja mill-Partit Laburista fl-2023.
Meta ħabbar ir-riżenja tiegħu, huwa kien qal li l-PL tbiegħed mill-prinċipji soċjalisti li bihom kien jemmen. Wara li telaq mill-partit, huwa kompla jservi fil-Kunsill Lokali tal-Gżira bħala sindku indipendenti.
Aktar kmieni fl-2023, Borg Manche kien ukoll daħal f’kunflitt pubbliku mal-eks President tal-Partit Laburista Ramona Attard, li dak iż-żmien kienet avukat tal-Awtorità tal-Artijiet.
Huwa kien iddeskriviha bħala “anti-soċjalista” wara li rrappreżentat lill-awtorità fil-pjan kontroversjali biex pompa tal-petrol tiġi rilokata fil-Ġonna tal-Gżira.
Ftit wara r-riżenja tiegħu mill-PL, Borg Manche kien qal li d-deċiżjoni tiegħu kienet ispirata minn diversi fatturi, fosthom dak li sejjaħ bħala l-ostinazzjoni tal-Gvern dwar l-inkjesta pubblika dwar il-mewt ta’ Jean Paul Sofia, qabel il-Gvern għamel U-turn fuq il-kwistjoni.
Borg Manche kien kiseb prominenza kmieni fil-karriera politika tiegħu meta fl-2016 ingħaqad ma’ attivisti li kissru ċ-ċint ta’ Manoel Island biex jitolbu aċċess pubbliku għall-gżira.
Fl-2024 huwa kien ukoll ikkontesta l-elezzjoni tal-Parlament Ewropew, f’dak li kien meqjus bħala ċaqliqa lejn il-lemin fil-politika tiegħu, hekk kif kien qal li kieku ġie elett kien se jingħaqad mal-grupp tal-European Conservatives fil-Parlament Ewropew.
