Il-Kap tal-Oppożizzjoni Alex Borg akkuża lill-Prim Ministru Robert Abela u lill-gvern tiegħu li qed jużaw il-vantaġġ tal-poter biex jibqgħu fil-Gvern.
F’attività politika fiż-Żurrieq, Borg qal lis-supporters li l-vjaġġ tal-Partit Nazzjonalista mhux wieħed faċli, iżda esprima fiduċja li l-partit jista’ jilħaq l-objettivi tiegħu.
Huwa rrimarka li ftit wara li Robert Abela ħabbar elezzjoni bikrija, diversi billboards tal-Partit Laburista dehru madwar il-pajjiż, fejn ftit qabel kien hemm reklamar tal-gvern.
Borg akkuża lill-Prim Ministru li qed ipoġġi l-interessi tal-partit qabel dawk tal-pajjiż, u semma summit tal-Unjoni Ewropea li sar nhar it-Tnejn, fejn qal li Abela kien l-uniku mexxej li ma attendiex.
Il-Kap tal-PN ikkritika wkoll id-deċiżjoni tal-Prim Ministru li jirtira minn dibattitu politiku li kien se jkun immexxi mill-ġurnalist Saviour Balzan, u qal li dan juri nuqqas ta’ preparazzjoni biex jiddibatti.
Meta tkellem mal-midja, Borg sostna li hu lest jattendi dibattitu fi kwalunkwe ħin.
Huwa żied li l-Partit Nazzjonalista għandu aktar inizjattivi li għadhom ma tħabbrux, u sostna li l-kampanja tal-partit hija mibnija fuq proposti konkreti u mhux fuq slogans jew attivitajiet ta’ relazzjonijiet pubbliċi.
