Il-Prim Ministru Iżraeljan Benjamin Netanyahu ċaħad il-proposti mill-Ħamas dwar waqfien mill-ġlied u qal li “rebħa totali” f’Gaża hija possibbli fi żmien xhur.
Huwa kien qed jitkellem wara li l-Ħamas ressaq sensiela ta’ talbiet bi tweġiba għal proposta ta’ waqfien mill-ġlied appoġġata minn Iżrael.
Netanyahu qal li n-negozjati mal-grupp huma strambi u mhu se jwasslu mkien.
It-taħditiet qed ikomplu biex jippruvaw jilħqu xi tip ta’ ftehim.
F'konferenza tal-aħbarijiet nhar l-Erbgħa, Netanyahu qal li “M'hemm l-ebda soluzzjoni oħra ħlief rebħa sħiħa u finali”. "Jekk il-Ħamas se jgħix f'Gaża, hija biss kwistjoni ta' żmien sal-massakru li jmiss."
L-uffiċjal anzjan tal-Ħamas Sami Abu Zuhri qal li r-rimarki ta’ Netanyahu “huma forma ta’ bravata politika”, u juru li beħsiebu jkompli l-kunflitt fir-reġjun.
Nhar il-Ħamis f’Kajr, xorta waħda huwa mistenni li titkompla s-sensiela ġdida ta’ negozjati, medjata mill-Eġittu u l-Qatar. L-Eġittu appella lill-partijiet kollha biex juru l-flessibbiltà meħtieġa biex jintlaħaq ftehim.
