Arrest, riżenja u akkużi fil-Qorti - Ġimgħa iebsa għal tliet politiċi kbar fl-Istati Uniti u r-Renju Unit

Tul l-aħħar ġranet, fl-aħbarjiet mix-xena internazzjonali raw tliet politiċi li xi darba kienu jmexxu u jirrappreżentaw lill-partiti u pajjiżi rispettivi tagħhom jiġu investigati b’rabta ma’ xi skandli li setgħu kienu involuti fihom.  

Fil-fatt, dawn l-iskandli huma marbuta mal-eks mexxejja tal-tal-iScottish National Party (SNP) u l-eks Ministru Skoċċiża, Nicola Sturgeon, l-eks Prim Ministru Brittaniku Boris Johnson, u l-eks President Amerikan Donald Trump. 

Dwar dawn il-każijiet, l-ILLUM tkellmet ma’ Brendan Zerafa li ta’ sikwit isegwi u janalizza aħbarjiet mix-xena internazzjonali, b’mod speċjali dawk marbuta mal-politika. Zerafa spjega li dawn it-tliet politikanti differenti li ħallew impatt sinifikanti fix-xena politika ta’ pajjiżhom, bħalissa mhux għaddejjin minn żmien sabiħ, iżda juru kif fil-politika, meta wieħed jibda t-triq tan-niżla, ieħor jibbenifika ferm minn dan. 

L-ewwel każ: Nicola Sturgeon 

Għal kważi deċenju, Sturgeon kienet figura importanti fil-politika Skoċċiża, hekk kif hija ħadet f’idejha l-partit SNP u saret l-ewwel mara fil-kariga tal-Ewwel Ministru wara li kienet intilfet kampanja biex l-Iskozja tingħata l-indipendenza. Hekk kif ħadet dan l-irwol f’idejha, il-partit tagħha sar l-akbar partit fl-Iskozja. Dan hekk kif rebħu 56 siġġu fil-kamra tar-rappreżentanti Brittanika, li tfisser żieda ta’ 50 siġġu mill-elezzjoni ta’ qabel. 

Fil-11 ta’ Ġunju, Sturgeon ġiet arrestata mill-Pulizija Skoċċiża b’rabta ma’ investigazzjoni fil-finanzi tal-SNP, hekk kif il-Pulizija kienet qed tinvestiga donazzjoni ta’ £600,000 lejn il-partit li kien ingħata għall-kampanja tal-indipendenza Skoċċiża, liema donazzjoni allegatament kienet devjata x’imkien ieħor. Hija nħelset mill-Pulizija dakinhar stess mingħajr akkużi, hekk kif l-investigazzjoni għadha għaddejja. 

Dwar Sturgeon, Zerafa nnota li mit-tliet politiċi li riċentement sabu ruħhom fi żmien iebes, hija l-iktar persuna li tistona minnhom it-tlieta. Dan hekk kif hija tħaddan politika tax-xellug, filwaqt li Zerafa ddeskriva lil Trump u Johnson bħala popolisti.  

Brendan Zerafa

Fl-Iskozja Zerafa stqarr li l-arrest ta’ Sturgeon diġà qed tħalli impatt fuq il-popolaritá tal-partit li kienet tmexxi, hekk kif il-Partit Laburista fl-Iskozja qed jiggwadanja minn din l-aħbar kerha għal Sturgeon. Fil-fatt, rapporti tal-aħbarjiet qed jindikaw li fl-elezzjoni ġenerali tar-Renju Unit li mistennija sseħħ fl-2024, l-SNP kapaċi jitlef nofs is-siġġijiet tiegħu għall-Partit Laburista. 

It-tieni każ: Boris Johnson 

L-eks Prim Ministru Brittaniku Boris Johnson huwa magħruf għall-personalità tiegħu u ismu huwa marbut, fost l-oħrajn, mat-tluq tar-Renju Unit mill-Unjoni Ewropea u numru ta’ skandli relatati mal-aġir tiegħu u l-Gvern li kien imexxi waqt il-pandemija tal-Covid-19. Simili għal Sturgeon, Johnson kien ġab suċċess kbir għall-partit tiegħu fl-elezzjoni ġenerali tal-2019, hekk kif il-Partit Konservattiv irnexxielu jirbaħ b’maġġoranza ta’ 80 siġġu fil-kamra tar-rappreżentanti. 

Minkejja dan, tliet snin wara, hekk kif numru ta’ skandli ħakmu l-gvern ta’ Johnson u numru ta’ deputati fil-partit tiegħu bdew jirreżenjaw, Johnson ħabbar ir-riżenja tiegħu bħala Prim Ministru u baqa’ fil-House of Commons bħala deputat. Dan sakemm ftit jiem ilu, huwa rriżenja minn din il-pożizzjoni b’rabta ma’ rapport li li juri kif Johnson intenzjonalment qarraq bil-kamra tar-rappreżentanti. Dan jorbot mal-fatt li waqt il-pandemija, meta kien hemm numru ta’ restrizzjonijiet li ma kinux iħallu nies jiltaqgħu, huwa kien preżenti f’festin fl-uffiċju tal-Prim Ministru. 

Johnson irreżenja minn deputat ftit jiem qabel ma ġie ppubblikat ir-rapport dwar dan il-festin, hekk kif skontu, kien se jiġi sfurzat biex jirreżenja. Minkejja dan, meta ħareġ ir-rapport, irriżulta li huwa kien se jħabbat wiċċu ma’ sospensjoni ta’ 90 jum biss.  

Hawn ukoll, Brendan Zerafa nnota kif dan l-iskandlu huwa ta’ benefiċċju wkoll għall-Partit Laburista Ingliż, li sa issa, jidher li qed igawdi minn dan l-iskandlu fl-aħħar sena qabel l-elezzjoni ġenerali fil-pajjiż. Fil-fatt, kelliema Laburisti Ingliżi qalu lill-midja li se jkunu qed jiġġieldu għas-siġġu ta’ Johnson, biex b’hekk ikunu fiċ-ċans li jibdew l-attakk tagħhom minn din is-sena. 

It-tielet każ: Donald Trump 

Illum il-ġurnata, Donald Trump huwa isem magħruf mad-dinja kollha u l-karriera politika tiegħu, għalkemm hija relattivament żagħżugħa kienet waħda unika u kontroversjali. Fl-aħħar jiem, Trump iddomina l-aħbarjiet internazzjonali għal darb’ oħra, hekk kif fil-Qorti affaċċja akkużi għat-tieni darba din is-sena, din id-darba, b’rabta ma’ dokumenti sigrieti li allegatament żamm wara li temm il-presidenza tiegħu wara l-aħħar elezzjoni fl-Istati Uniti.  

Aktar kmieni din is-sena, Trump kien akkużat ukoll li qabel ma kien President tal-Istati Uniti, iffalsifika dokumenti tan-negozju sabiex iħallas lill-pornstar Stormy Daniels, biex ma titkellimx dwar relazzjoni li kellhom qabel l-elezzjoni tal-2016. 

Dwar Trump, Zerafa tkellem fit-tul dwar kif huwa differenti miż-żewġ politiċi li ddiskuta. Dan hekk kif filwaqt li Boris Johnson u Nicola Sturgeon temmew il-karriera politika tagħhom, Trump xorta waħda qed jimmira li jkun il-kandidat tar-Repubblikani għall-Presidenza tal-Istati Uniti għal darb’oħra. 

Zerafa nnota li bil-mod karatteristiku ta’ Trump, huwa qed jipprova juża din l-isfida għall-vantaġġ tiegħu, hekk kif ftit wara li ħareġ mill-Qorti, l-organizzazzjoni ta’ Trump bagħtet email lill-miljuni ta’ partitarji tiegħu b’appell għad-donazzjonijiet.  

Minkejja dan, ġie nnutat li dan il-każ kontra Trump ta opportunità biex il-kandidati Repubblikani b’aspirazzjonijiet presidenzjali jkunu jistgħu jattakkawh, iżda ċertu kandidati qed iżommu lura minn dan.  

Brandan Zerafa stqarr li fil-każ ta’ dawn it-tliet figuri, il-fatt li bdew jiġu investigati wara li niżlu mill-poter jista’ jagħti x’jifhem li l-influwenza tagħhom meta kienu fil-poter kienet twassal għal ċertu biżà biex jittieħdu l-passi fil-konfront tagħhom. Minkejja dan, Zerafa jispjega li fil-każ ta’ Trump jidher li dawn l-iskandli kontinwi qed ikollhom effett fuq il-popolarità tiegħu u b’hekk jidher li minkejja r-reputazzjoni ġiganteska ta’ politiċi bħal Trump, l-elettorat xorta waħda kapaċi jikkastigahom għall-iżbalji tagħhom.