Ir-Renju Unit iqum f'luttu; X'se jiġri llum? X'inhuma l-ewwel impenji tar-Re Karlu III?

Illum ir-Re Karlu III jibda l-ewwel impenji tiegħu li jinkludu l-ewwel messaġġ lir-Renju Unit u anke l-bidu ta' tħejjija għall-Funeral Irjali

Il-Prinċep Charles jakkumpanja lir-Reġina fiċ-ċerimonja tal-Ftuħ tal-Parlament
Il-Prinċep Charles jakkumpanja lir-Reġina fiċ-ċerimonja tal-Ftuħ tal-Parlament

Kif wieħed jista’ jimmaġina, dalgħodu r-Renju Unit qam f’luttu. Hekk kif ilbieraħ bosta kienu dawk maħsuda bil-mewt tar-Reġina Eliżabetta II, minn dalgħodu tibda era ġdida għar-Renju Unit.

Mil-lum mhux biss jibdew il-preparamenti biex tkun iċċelebrata l-ħajja tar-Reġina li ħabbitha d-dinja, imma anke jibdew l-ewwel impenji tar-Re Karlu III.

Matul il-lejl li għadda, ir-Re Karlu u martu Kamilla, issa Reġina, baqgħu fil-palazz ta’ Balmoral fl-Iskozja. Huma kienu hemm flimkien mal-Familja Rjali biex ikunu viċin ir-Reġina fl-aħħar mumenti tagħha.

X'se jagħmel illum ir-Re Karlu III?

Madanakollu, dalgħodu stess, ir-Re Karlu III, kif għażel li jissejjaħ, se jasal Londra u l-ewwel impenn tiegħu se tkun laqgħa mal-Prim Ministru l-ġdid Liz Truss.

Wara, ir-Re Karlu, jiltaqa’ mad-Duka ta’ Norflok li tradizzjonalment ikun inkarigat mhux biss mit-tranżizzjoni imma anke mill-funeral tar-Reġina, li jkun mifrux fuq diversi jiem, fl-għaxart ijiem li ġejjin.

It-tebut bir-Reġina meta jinġieb lura Londra?

Fil-fatt, issa tibda t-tħejjija, biex ir-Reġina tinġieb lura Londra fejn titpoġġa f’Westminister Hall. Hawn, il-pubbliku jkollu ċans jagħti l-aħħar tislima lir-Reġina, qabel il-purċissjoni u l-Funeral Irjali li ssir fi żmien għaxart ijiem.

Eluf ta' nies jinżlu quddiem il-Palazz Buckingham ilbieraħ
Eluf ta' nies jinżlu quddiem il-Palazz Buckingham ilbieraħ

Eventwalment, l-aħħar vjaġġ tar-Reġina jkun lejn Windsor fejn tindifen fil-Kappella ta’ San Ġorġ, biswit missierha, ir-Re Ġorġ VI u anke żewġha, il-Prinċep Filippu.

Kif se tingħata tislima llum ir-Reġina Eliżabetta?

Illum ukoll, il-Gvern Ingliż jikkonferma il-luttu nazzjonali, li mistenni jdum madwar 12-il ġurnata filwaqt li l-qniepen ta’ Westminister Abbey, il-Katidral ta’ San Pawl u tal-Kastell Windsor, idoqqu 96 tokk bl-akbar qanpiena, jiġifieri tokk għal kull sena li r-Reġina għamlet ħajja.

L-istess isir permezz ta’ salut bil-kanuni madwar it-Renju Unit.

Għall-ewwel darba wkoll, ir-Re Karlu III jindirizza lin-nazzjon permezz ta’ messaġġ televiżiv. Dan mistenni jixxandar illejla. Fil-messaġġ, ir-Re Karlu jsellem mhux biss lill-ommu imma anke jwiegħed id-dedikazzjoni tiegħu għall-poplu kollu.

Fil-Katidral ta’ San Pawl issir ukoll l-ewwel ċelebrazzjoni li fiha titfakkar ir-Reġina Eliżabetta II. Għal din iċ-ċelebrazzjoni, tattendi l-Prim Ministru u l-għola uffiċjali tal-pajjiż.

Malli lbieraħ inxterdet l-aħbar li mietet ir-Reġina, eluf marru quddiem il-Palazz Buckingham jsellmu l-memorja tagħha, permezz ta’ fjuri, xemgħat u messaġġi. L-istess ġara f’Windsor u hekk mistenni li jibqa’ jsir fil-jiem li ġejjin.

Il-proklamazzjoni uffiċjali tar-Re Karlu III

Ta’ min ifakkar li malli mietet ir-Reġina, binha Karlu mill-ewwel sar ir-Re, madanakollu xorta waħda jiġi pproklamat b’mod uffiċjali. 

Din iċ-ċerimonja ssir fil-Palazz ta’ San Ġakbu f’Londra quddiem dak magħruf bħala Accession Council. Din hija biss ċelebrazzjoni ċerimonjali. Ir-Re ma jieħu l-ebda ġurament.

Dan ikun magħmul mill-aktar persuni viċin il-Familja Rjali, is-Sindku ta’ Londra, grupp ta’ Deputati kemm dawk li għadhom fis-servizz u dawk li le, Kummissarji għolja tal-Commonwealth u oħrajn. Preżenti wkoll l-Arċisqof ta’ Canterbury. Jistgħu jattendu sa 700 ruħ.

F’din il-laqgħa, il-President tal-Kunsill iħabbar il-mewt tar-Reġina u jaqra l-proklamazzjoni.

Għal din il-laqgħa, il-Re ma jkunx preżenti, imma jattendi għat-tieni laqgħa li ssir ftit tas-sigħat wara. F’din il-laqgħa, ir-Re jagħmel dikjarazzjoni.

Fil-preżenza tar-Re u anke d-daqq tal-fanfarra, minn fuq gallarija, tinqara l-proklamazzjoni uffiċjali. 

Għall-ewwel darba mill-1952, jindaqq l-innu nazzjonali, iżda issa bil-kliem “God Save the King.”

Meta ssir l-Inkurunazzjoni?

L-aktar parti għolja ta’ din it-tranżizzjoni tkun l-Inkurunazzjoni. Madanakollu din ma jfissirx li ssir f’qasir żmien.

L-Inkurunazzjoni tar-Reġina Eliżabetta II
L-Inkurunazzjoni tar-Reġina Eliżabetta II

Eliżabetta II saret Reġina fi Frar 1952 iżda l-Inkurunazzjoni saret f’Ġunju tas-sena ta’ wara. Karlu III se jkun l-40 Re li se jkun inkurunat f’Westminister Abbey.

Din ma tkunx ċelebrazzjoni ċivili kif isir f’pajjiżi oħra fejn għad hemm il-Monarkija, bħal Spanja, iżda hija ċelebrazzjoni reliġjuża li titmexxa mill-Arċisqof ta’ Canterbury.

Il-qofol taċ-ċelebrazzjoni u l-aktar parti sagra tkun id-dilka biż-żejt ikkonsagrat u wara l-Inkurunazzjoni, bil-kuruna magħrufa bħala ta’ St Edward, liema kuruna tmur lura għall-1661 u tintuża biss dakinhar tal-Inkurunazzjoni.

More in Barranin