Bħalissa, wieħed mill-aktar oġġetti diffiċli li ssib fuq l-ixkafef tal-merċa fl-Istati Uniti huwa wieħed mill-aktar importanti: it-trab tal-ħalib għat-trabi. In-nuqqas ta' dan it-trab bagħat lill-familji jiġru madwar l-Istati Uniti, bl-aktar vulnerabbli jintlaqtu l-aktar min-nuqqas ta' provvista.
Fil-fatt fl-Isptar ta’ Memphis ġewwa Tennesee, wieħed mill-Istati l-iktar milquta, diġà daħlu żewġt itfal li ma jistgħux jassorbu n-nutrijenti kif suppost minħabba kundizzjoni medika u m’għandhomx aċċess għall-ħalib tat-trab speċifiku li għandhom bżonn.
Pressjonijiet ekonomiċi fit-tul li oriġinaw l-ewwel mill-pandemija ħarbtu il-ktajjen tal-provvista. Fl-istess waqt Abbott Laboratories ġewwa l-Istati Uniti bdiet sejħa għat-trab tal-ħalib għat-trabi wara li rċevew rapporti ta' infezzjoni f'diversi trabi, inkluż rapporti ta' salmonella. F’nofs Frar, l-Amministrazzjoni ta' l-Ikel u d-Droga Amerikana (FDA) ħabret li prodotti tat-trab tal-ħalib għat-trabi, inklużi Similiac, Alimentum u EleCare kellhom jerġgħu jinġabru kollha.
Sabiex isolvu din il-problema numru ta' familji qed ikollhom iduru għal xiri ta' dan il-prodott mill-Ewropa permezz ta' siti online bħal Amazon u Ebay. Għalkhemm iz-zalza tiġihom ogħla mill-ħuta, il-familji Amerikani qed iserħu rashom li uliedhom għandhom x'jieħdu.
Kemm hi gravi s-sitwazzjoni?
Sat-8 ta' Mejju, 43% ta' dan il-prodott kienu out of stock fi ħwienet ewlenin madwar il-pajjiż kollu. Kumpaniji inklużi CVS, Target u Walgreens , ħwienet kummerċjali ewlenin fl-Amerika, qed jillimitaw kemm jistgħu jixtru minn dan il-prodott il-konsumaturi u uħud għamlu limitu tax-xiri.
Ir-residenti ta’ Tennessee qed jiffaċċjaw l-ogħla rati ta’ out of stock, filwaqt li bliet inklużi Las Vegas, Houston u Charlotte qed jaraw ħafna xkafef vojta, għal kull Datasembly.
Nies bi dħul baxx huma partikolarment affetwati. Mingħajr ħafna flus kontanti disponibbli, xi familji ma setgħux jaħżnu it-trab u qed iħabbtu wiċċhom ma' żieda fil-prezz minn bejjiegħa sekondarji jew li jkollhom iħallsu miżati għolja minn bejjiegħa onlajn. F'ħafna stati, Abbott Nutrition hija l-unika kumpanija li tipprovdi għal familji bi dħul baxx li jiksbu benefiċċji permezz tal-Programm Speċjali ta' nutrizzjoni supplimentari għan-nisa, trabi u tfal, magħruf bħala WIC. Dan ifisser li l-ġenituri li jixtru l-formula jridu jagħmlu l-pass żejjed li jikkuntattjaw l-uffiċċju lokali tal-WIC tagħhom għal alternattivi jew iħallsu minn buthom.
Għal numru ta' ommijiet mhux għażla li jreddgħu t-tarbija...
Ommijiet ġodda li jistgħu jreddgħu t-tarbija tagħhom dejjem huma mħeġġa jagħmlu dan iżda għal xi nies ovvjament din mhux possibli u jiddependu biss fuq dan it-trab.
Fosthom hemm ġenituri adottivi, ommijiet b'kundizzjonijiet tas-saħħa jew provvista limitata tal-ħalib tas-sider, jew trabi b'allerġiji huma biss ftit mill-ħafna li jiddependu fuq dan it-trab.
Skont ċifri taċ-Ċentru għall-Kontroll u l-Prevenzjoni tal-Mard fl-Amerika, sal-età ta' sitt xhut, huma biss kwart tat-trabi fl-Istati Uniti li jitreddgħu.
Jekk omm tkun tista' treddgħa tarbija xorta hemm sitwazzjonijiet pratiċi li jwaqqfuha tagħmel dan. Ir-riċerka turi li nuqqas ta’ riżorsi fuq il-post tax-xogħol, bħal spazju dedikat, jista’ jġiegħel ġenitur jieqaf ireddgħa aktar kmieni.
