Minn tal-inqas żewġ persuni tilfu ħajjithom u tnax-il persuna weġġgħu wara attakk mill-ajru minn Forzi Russi u li matulu ntlaqat bini residenzjali fil-Kapitali Ukrena, Kyiv.
Ritratti u anke filmati juru d-diżastru li ħalla dan l-attakk u anke l-pumpiera jevakwaw diversi residenti li nqabdu fil-binja.
L-attakk seħħ ftit sigħat biss qabel kellha tibda r-raba' diskussjoni bejn id-delegazzjonijiet miż-żewġ pajjiżi.
It-tama, li dawn id-diskussjonijiet iħallu xi forma ta' progress diplomatiku tqawwiet hekk kif Mykhailo Podolyak, membru tad-delegazzjoni Ukrena, qal li d-diskussjonijiet tal-aħħar jiem kienu "kostruttivi."
"Jiena naħseb li se nkunu qed niksbu xi riżultati fil-jiem li ġejjin," qal Podolyak f'filmat ippubblikat onlajn.
Intant, aktar Ukreni komplew jaħarbu mill-gwerra f'pajjiżhom. Xejn inqas minn 1.75 miljun persuna qasmu lejn il-Polonja.