Testijiet ta' Pfizer juru li l-vaċċin li żviluppaw huwa effettiv aktar minn 90%

Il-vaċċin kien ittestjat fuq 43,500 persuna mxerrda f'sitt pajjiżi u apparti li jidher li huwa effettiv ma tqajjem l-ebda tħassib dwar is-sigurtà tiegħu

Il-kumpanija tal-farmaċewtika Pfizer flimkien ma' BioNTech, ħabbru li l-ewwel riżultati dwar il-vaċċin tagħhom wera li dan huwa effettiv aktar minn 90% biex jippreveni l-Covid-19 u ddeskrivew dan bħala: "jum importanti ħafna għax-xjenza u l-umanita."

Il-vaċċin tagħhom kien ittestjat fuq 43,500 persuna mxerrda f'sitt pajjiżi u apparti li jidher li huwa effettiv ma tqajjem l-ebda tħassib dwar is-sigurtà tiegħu.

Fil-fatt, il-kumpaniji qed jippjanaw li japplikaw għal approvazzjoni urġenti bil-għan li l-vaċċin ikun jista' jibda jintuża sal-aħħar tax-xahar.

X’nafu dwar il-vaċċin ta’ Pfizer?

Pfizer qed taħdem id f’id mal-kumpanija Ġermaniża BioNTech u anke mal-kumpanija Ċiniża Fosum Pharma. 

F’Mejju, dawn bdew l-ewwel testijiet fuq żewġ verżjonijiet tal-vaċċin. Fiż-żewġ każi, il-voluntiera li ħadu sehem żviluppaw Ċelloli T, li huma importanti biex jiġġieldu l-virus. Wieħed minn dawn il-verżjonijiet ipproduċa ħafna inqas effetti sekondarji, inqas deni u inqas għejja fost il-pazjenti u għalhekk għadda għall-aktar fażi kruċjali ta’ testijiet. 

Anke f’dan il-każ, it-tielet fażi kienet tinkludi l-parteċipazzjoni ta’ 43,000 voluntier mill-Istati Uniti u pajjiżi oħra, fosthom l-Arġentina, il-Brażil u l-Ġermanja. Fit-12 ta’ Settembru, Pfizer u BioNTech ħabbru li se jkunu qed jespandu t-testijiet tagħhom fl-Istati Uniti għal 43,000 parteċipant, filwaqt li fl-aħħar ġimgħat ingħataw ukoll il-permess biex jibdew jittestjaw il-vaċċin fuq it-tfal.

Għal dan il-vaċċin, l-Istati Uniti ffirmat kuntratt ta’ $1.9 biljun jekk din tipprovdi 100 miljun doża sa Diċembru u 500 miljun doża oħra wara. Anke l-Ġappun daħal f’kuntratt ma’ din il-kumpanija. 

Jekk ir-riżultati jkunu pożittivi, il-kumpanija qalet li kapaċi tipproduċi 1.3 biljun doża madwar id-dinja sal-aħħar tal-2021.

Bħal ħafna mill-vaċċini oħra li jinsabu fl-istadju tal-ittestjar, dan il-vaċċin jirrikjedi li jittieħdu żewġ dożi differenti. 

Madanakollu hemm ukoll sfidi marbuta ma' dan il-vaċċin sakemm jasal mill-fabbriki għal għand in-nies. Bħall-vaċċini oħra, fosthom ta’ Moderna, dan il-vaċċin jeħtieġ jinżamm f’temperaturi baxxi ħafna, jiġifieri mhux aktar minn 80 grad taħt iż-żero sakemm ikun injettat.

X'kien qal iċ-Chairperson u l-Kap Eżekuttiv ta’ Pfizer?

Fl-aħħar ġimgħat, il-ġurnal ‘The Mail on Sunday’ żvela kif il-kumpanija tal-farmaċewtika Pfizer diġà mmanifatturat mijiet ta’ eluf ta’ dożi tal-vaċċin kontra l-Covid-19 fl-impjant li għandha f’Puurs fil-Belġju. 

Fil-fatt, fuq is-sit, l-istess ġurnal saħansitra ppubblika filmat li juri eluf ta’ dożi tal-vaċċin, wieħed wara l-ieħor. Ovvjament dawn għalissa jibqgħu fejn huma sakemm isiru t-testijiet kliniċi kollha meħtieġa u jkun hemm iċ-ċertifikazzjoni tar-regolaturi tal-mediċina li jiddikjarawh sigur u effettiv.

F’kummenti mal-istess ġurnal, il-Kap ta’ Pfizer fir-Renju Unit, Ben Osborne saħaq li “kien mument inkredibbli” meta ra l-ewwel vaċċin jiġi mmanifatturat.

Madanakollu insista li wieħed jista’ jħaffef biss “sakemm tħallih ix-xjenza” hekk kif ovvjament, qabel jibda jitqassam u jingħata, irid ikun approvat bħala effikaċi u sigur.

F’ittra miftuħa, ippubblikata fuq is-sit tal-kumpanija, iċ-Chairperson u l-Kap Eżekuttiv ta’ Pfizer, Albert Bourla kien wera t-tama li sal-aħħar ta’ Ottubru jkun magħruf, skont it-testijiet li qed isiru, jekk il-vaċċin huwiex effettiv jew le.

Iżda l-effettività mhijiex kollox. Bourla insista li l-vaċċin jeħtieġ ikun sigur u insista li l-istandards tar-regolaturi huma għolja mmens. Fil-fatt kien bassar li sal-aħħar ta’ Novembru, Pfizer ikollha f’idha ċ-ċertifikat mingħand il-FDA (Food and Drug Administration tal-Istati Uniti).

It-tielet u l-aħħar rekwiżit se jkun li l-kumpanija tipprovdi l-informazzjoni kollha dwar il-manifattura tal-vaċċin biex ikun assigurat il-konsistenza u l-kwalità tiegħu.

Skont Bourla, dejjem jekk ir-riżultati jkunu pożittivi, Pfizer se tkun qed tapplika għal dak magħruf bħala “Emergency Authorisation Use” fl-Istati Uniti. Ovvjament dan jista’ jsir biss jekk lejn l-aħħar ta’ Novembru, il-vaċċin jirċievi ċ-ċertifikat li hu sigur mingħand l-FDA.

More in Barranin