L-aħħar testijiet kliniċi fuq vaċċin kontra l-Covid-19 li qed isiru mill-kumpanija AstraZeneca bi sħab mal-Università ta’ Oxford, kellhom jieqfu ħesrem hekk kif wieħed mill-parteċipanti ħassu ma jiflaħx ftit wara li tlaqqam u kellu jiddaħħal l-isptar.
Fi stqarrija, il-kumpanija ddeskriviet din il-waqfa bħala waħda ta’ “rutina” hekk kif wieħed mill-parteċipanti kellu għaliha reazzjoni “mhux spjegata.”
Anke l-Università ta’ Oxford, filwaqt li ma tatx dettalji tas-sintomi li żviluppa l-parteċipant, insistiet li dawn huma affarijiet normali.
Kelliem għall-Università qal: “f’testijiet fuq skala kbira, hemm ċans kbir li jkun hemm min jiżviluppa sintomi jew ikun ma jifħalx,” filwaqt li insista li dawn il-każi jridu jkunu eżaminati indipendentament u bl-akbar reqqa qabel ma jkomplu t-testijiet.
Dan il-vaċċin kien meqjus bħala wieħed mill-aktar kandidati b’saħħithom fost għexieren oħra li qed ikunu żviluppati globalment.
Fil-fatt kien hemm tama qawwija li dan il-vaċċin jista’ jkun wieħed mill-ewwel li joħroġ fis-suq u dan hekk kif l-ewwel żewġ fażi ta’ testijiet kliniċi kienu suċċess.
Il-vaċċin għadda għat-tielet fażi fil-ġimgħat li għaddew. Din il-fażi tinkludi l-parteċipazzjoni ta’ 30,000 persuna li ġejjin mill-Istati Uniti, ir-Renju Unit, il-Brażil u l-Afrika ta’ Isfel.
Normalment, meta jkun qed jiġi żviluppat vaċċin, din il-fażi ġieli tieħu snin.
