L-Italja u Spanja huma fost numru ta’ pajjiżi oħra Ewropej li mil-lum komplew inaqqsu r-restrizzjonijiet li imponew biex jikkontrollaw l-imxija tal-COVID-19.
Ħafna negozji fl-Italja, inkluż il-bars u r-ristoranti, se jkunu jistgħu jiftħu l-bibien tagħhom wara aktar minn xahrejn magħluqa.
Spanja se tkun qed tnaqqas ir-restrizzjonijiet barra Madrid u Barċellona fejn saħanistra persuni se jkunu jistgħu jinġabru fi gruppi ta’ mhux aktar minn 10 persuni.
Dawn il-miżuri tnaqqsu hekk kif iż-żewġ pajjiżi baqgħu jaraw tnaqqis fl-għadd tal-vittmi, bl-Italja, ilbieraħ ikollha l-inqas għadd ta’ imwiet minn Marzu.
Fil-fatt, ilbieraħ, fl-Italja mietu 145 persuna, numru baxx ħafna meta wieħed iqabblu mad-900 persuna li mietu fis-27 ta’ Marzu.
X’se jkun qed jiftaħ?
Ir-ristoranti, il-bars, il-kafetteriji, il-hairdressers u ħwienet oħra se jkunu qed jiftħu mill-ġdid il-bibien tagħhom anke jekk taħt miżuri stretti ta’ social distancing.
Il-knejjes ukoll fetħu mill-ġdid il-bibien tagħhom għall-qudddies iżda kulħadd irid jilbes il-maskri u jpoġġi ‘l bogħod minn ħaddieħor.
Minkejja dawn il-miżuri, l-awtoritajiet tas-saħħa qed javżaw li għadu kmieni wisq biex persuni jinġabru f’ġemgħat kbar.
Fi Spanja, il-maġġoranza tal-poplu se jkun ħareġ mil-lockdown sal-aħħar ta’ din il-ġimgħa.
L-Ispanjoli se jkunu jistgħu jmorru ġo barijiet u anke ristoranti iżda jpoġġu biss fuq l-imwejjed barra u mhux ġewwa. Laqgħat mal-qraba jew ħbieb jistgħu jsiru sakemm il-ġemgħat ma jkunux akbar minn 10 persuni.
F’Madrid u Barċellona, fost oħrajn, il-maġġoranza tar-restrizzjonijiet se jibqgħu fis-seħħ.
