Ryanair qed tippjana li tibda topera 40% tat-titjiriet tagħha minn Lulju li ġej
Ryanair qed tbassar li minn Lulju topera madwar 1,000 titjira kuljum
More in Barranin
Ryanair qed tbassar li minn Lulju topera madwar 1,000 titjira kuljum
Il-linja tal-ajru Ryanair qed tippjana li tintroduċi lura madwar 40% tat-titjiriet tagħha mill-1 ta’ Lulju li ġej hekk kif ir-restrizzjonijiet tal-ivjaġġar bdew jitnaqqsu f’diversi ajruporti.
Ryanair qed tbassar li minn Lulju topera madwar 1,000 titjira kuljum. Dan ifisser li se tkun qed topera kważi r-rotot kollha tagħha.
Biex dan iseħħ se jkunu qed jittieħdu diversi prekawzjonijiet. Fost dawn, kemm l-ekwipaġġ u anke l-passiġġiera se jkunu kostretti jilbsu l-maskri matul it-tijira kollha.
Il-kjuwijiet għat-toilet mhux se jkunu permessi u wieħed irid jitlob permess biex iqum minn postu.
Hu mifhum ukoll li l-passiġġiera se jkunu mitluba jagħmlu ċ-check-in online u anke jtellgħu magħhom inqas affarijiet abbord l-ajruplan.
Il-biljett tal-ajru jrid jibda jitniżżel fuq il-mowbajls.
Il-kumpanija qalet li l-ajruplani kollha se jkunu ddiżinfettati kuljum.
Minn meta daħlu fis-seħħ ir-restrizzjonijet, Ryanair kienet qed topera madwar 30 titjira kuljum bejn l-Irlanda, ir-Renju Unit u l-Ewropa.
Il-Kap Eżekuttiv tar-Ryanair, Michael O'Leary saħaq li l-Gvern Ingliż qal li fejn is-social distancing mhuwiex possibbli, wieħed għandu jilbes il-maskri u hekk se jkun qed jiġri fuq l-ajruplani, waqt li ċaħad il-proposta biex bejn passiġġier u ieħor jinżamm post vojt.