L-għadd tal-vittmi tal-COVID-19 niżel għall-aktar livelli baxxi fl-aħħar ġimgħat fit-tliet pajjiżi Ewropej l-agħar milquta mill-pandemija, jiġifieri l-Italja, Spanja u Franza.
Ilbieraħ, fl-Italja, 260 persuna tilfu ħajjithom kawża tal-virus. Anke jekk in-numru mhuwiex żgħir, huwa ħafna inqas mill-għadd tal-imwiet li kienu qed ikunu rrapportati fl-aħħar ġimgħat.
Fi Franza, ilbieraħ, kienet irrapportata 242 mewta, l-iżgħar ammont mill-bidu ta’ Marzu ‘l hawn, filwaqt li fi Spanja, l-għadd tal-fatalijiet niżel għal 288 każ fl-aħħar 24 siegħa, l-inqas amont mill-20 ta’ Marzu ‘l hawn.
Intant, kemm fi Spanja u anke fl-Italja, bdew jiġu merħija xi restrizzjonijiet, fejn fi Spanja, pereżempju, it-tfal ingħataw permess joħorġu għal siegħa waħda kuljum.
L-Italja, l-ewwel pajjiż li mpona lockdown fl-Ewropa, se tkun qed tippermetti li s-settur tal-manifattura jerġa’ jibda jopera mill-4 ta’ Mejju li ġej.
Ir-ristoranti u l-barijiet se jibqgħu magħluqa u l-iskejjel se jibqgħu magħluqa sa Settembru.
Il-lockdown fl-Italja jiġi fi tmiemu nhar il-Ħadd li ġej, anke jekk il-Prim Ministru Taljan Giuseppe Conte xorta waħda appella biex kemm jista’ jkun min ma jkollux bżonn joħroġ jibqa’ d-dar u min joħroġ jilbes il-maskra.
