L-Iraq jordna lit-truppi Amerikani biex jitilqu mill-pajjiż; Trump jhedded b'sanzjonijiet severi
It-tensjoni żdiedet wara li l-ġimgħa li għaddiet sar attakk f’Baghdad li matulu ġie maqtul il-Ġeneral Iranjan Qasem Soleimani
minn Yendrick Cioffi
Il-President Amerikan Donald Trump hedded b’sanzjonijiet severi wara li l-Parlament tal-Iraq ordna lit-truppi Amerikani biex jitilqu mill-pajjiż.
“Għandna bażi tal-ajru straordinarja u li swiet ħafna flus fl-Iraq. Swiet biljuni ta’ dollari. Mhux se nitilqu qabel ma jħallsuna tagħha,” qal Trump lill-ġurnalisti.
It-tensjoni żdiedet ħafna wara li l-ġimgħa li għaddiet, fuq ordni tal-President Trump sar attakk f’Baghdad li matulu ġie maqtul il-Ġeneral Iranjan Qasem Soleimani, meqjus bħala t-tieni l-aktar persuna b’saħħitha fil-pajjiż.
L-Iran immedjatament saħqet li l-Istati Uniti se tkun qed tpattiha.
Soleimani, li kellu 62 sena, kien imexxi l-operazzjonijiet militari Iranjani fil-Lvant Nofsani u għall-Istati Uniti kien meqjus bħala terrorist.
Intant il-ġidem tal-ġeneral wasal lura f’pajjiżu fejn saru l-funeral, bit-toroq tal-Kapitali Iranjana Tehran jippakkjaw ruħhom b’eluf ta’ persuni li ħarġu jagħtuh l-aħħar tislima.
