Malta muta dwar l-intenzjoni ta’ Trump li jiddikjara Greenland parti mill-Istati Uniti

“Malta qatt ma dehret paljazza u satellita ta’ l-Istati Uniti daqs illum,”  dan qalu Ministru Laburista ewlieni hekk kif Malta baqgħet tevita li tikkumenta fuq l-intenzjoni ta’ Donald Trump li jieħu Greenland li hija parti mid-Danimarka.   

U kompla jgħid:  “Dan biex mingħalina nidhru sbieħ mal-Amerikani u ma Trump.  Mhux sew li qed nagħmlu li nkunu servili lil Amerika. Dan mhux il-Partit Laburista li naf jien.” 

“Jien ċert li dan mhux dak li jixtieq Robert Abela.” 

Il-President Amerikan minkejja li huwa lemini u f’ċerti istanzi lemin estrem sab l-ammirazzjoni tal-Gvern Malti li huwa mmexxi mill-Partit Laburista li infatti huwa membru fil-grupp Socialist Interrnational.    

Iżda jidher ċar li l-era tal-Perit Dom Mintoff u Alfred Sant u George Vella li kienu tradizzjonalment kritiċi ħafna tal-Amerika huwa eku tal-passat hekk kif il-Partit Laburista inħakem minn ħsieb prevalenti b’dikjarazzjoni pubblika favur il-politika Amerikana. 

Fost dawn kien hemm l-eks Prim Ministru Joseph Muscat li kien jiftaħar kemm jammira il-Trump u anke l-Ministru preżenti tal-Affarijiet Barranin Ian Borg.  Borg grazzi għal fatt li wieħed minn nies l-iktar viċin Trump kien Sergio Gor li kien trabba Bormla u kien jaf il-Muscat u anke Keith Schembri il-kap tas-segretarjat ta’ Muscat.  Gor li illum huwa ambaxxatur tal-Istati Uniti fl-Indja kien għamel mezz biex wieħed mill-mistiedna għall-inawgurazzjoni ta’ Donald Trump f’Jannar kien Borg stess. 

Borg sorprenda lil kullħadd meta ftit ġimgħat ilu ippropona lil Trump għal premju tal-paċi.  L-azzjoni ta’ Borg tikkontrasta bil-kbir mas-sentiment Ewropew ta’ dawk li jiffurmaw parti mill-familja soċjal demokratika.  

Il-biża li Trump jiddikjara Greenland parti mill-Amerika huwa li dan il-pass żgur iwassal għal kriżi kbira fin-Nato u kif ukoll fir-relazzjonijiet bejn l-Istati Uniti u l-Ewropa.   

Fl-Unjoni Ewropea kien hemm dikjarazzjonijiet li jaffermaw l-appoġġ lil Danimarka.  U fuq livell ta’ mexxejja kien hemm bosta pajjiżi li qalu ċaru u tond li ma jaqblux ma’ Trump.   

Malta kienet fost dawk li ma qalu xejn.  

L-istess Ministru qal lil din il-gazzetta: “Mela fuq l-Palestina domna seklu biex niddeċiedu dwar ir-rikonoxximent u issa ser noqgħodu kwieti fuq Greenland.  Ma jistax ikun li anke fuq din noqgħodu lura għax iridu nidhru sbieħ ma’ Trump.”