Għidli naqra: Il-Band Haine

Minn fejn bdiet l-istorja tal-band? 

Haine bdiet fl-aħħar tal-2017 bħala ħtieġa aktar milli sempliċement idea. Claudio Toscano (bass) u Jean, il-kitarrist oriġinali li reġa’ ngħaqad mal-band fl-2025, riedu joħolqu proġett li jindirizza nuqqas ċar fix-xena lokali: band “deathcore” li ma tibżax tesperimenta, timbotta l-limiti u toħloq identità tagħha stess. Ftit wara, ingħaqdu Chris Bonello bħala kantant u Konrad Saliba fuq id-drums, u b’hekk ġiet iffurmata l-qalba li minnha beda kollox. 

Tul is-snin, Haine għaddiet minn diversi bidliet fil-line-up, xi ħaġa normali ħafna għall-bands li qed ifittxu mhux biss mużiċisti tajbin, imma nies li jaqsmu l-istess viżjoni, etika, u livell ta’ impenn. Dan ukoll huwa proċess naturali li għen biex il-proġett jimmatura u jissaħħaħ. Kull bidla kienet lezzjoni u kull fażi ħalliet impatt fuq il-ħoss u l-mentalità tal-band. Illum, bil-line-up attwali, Haine tinsab f’punt fejn tħoss li sabet l-ekwilibriju perfett: band li hija stabbli, kreattivament miftuħa, u aktar b’saħħitha minn qatt qabel. 

Kontu tafu lil xulxin qabel ma kontu fil-band flimkien? 

Iva, u dan kellu rwol importanti ħafna fl-iżvilupp tal-band. Claudio kien diġà jaf lil Chris minn band oħra li kienu daqqew fiha flimkien, MilkMi, u kien hemm diġà livell ta’ fehim mużikali u personali bejniethom. Lil Jean u Konrad kien jafhom permezz tal-attività tagħhom fix-xena metal Maltija, u Claudio kien anke daqq ma’ Konrad fi proġett ieħor li ma kinux komplew bih. Dawn il-konnessjonijiet minn qabel għenu biex Haine tinbena fuq relazzjonijiet veri u mhux biss fuq auditions. F’xena żgħira bħal dik Maltija, ir-relazzjonijiet, ir-rispett, u r-reputazzjoni huma kruċjali. Dan il-fatt għen biex il-band tibni dinamika soda, fejn il-komunikazzjoni u l-kollaborazzjoni dejjem kienu prijorità. 

Madankollu, mhux kull rabta nbniet fuq storja twila. Claudio sar jaf lil Jack Pisani kważi b’kumbinazzjoni. Dak iż-żmien ma kienx jafu personalment, iżda deher ċar li kien kitarrist b’potenzjal kbir u b’togħma mużikali simili. Kien riskju kkalkulat li, maż-żmien, wera li kien riskju tajjeb aktar milli kien mistenni. Illum, Jack mhux biss huwa parti integrali mill-ħoss ta’ Haine, iżda huwa wkoll wieħed mill-persuni li jgħin l-aktar lil Claudio fit-tmexxija tal-band fuq bażi ta’ kuljum, kemm fuq livell kreattiv, kif ukoll organizzattiv. Dan juri kif Haine dejjem kienet miftuħa li tagħti spazju lil talent ġdid u tinvesti fin-nies, mhux biss fil-mużika. 

Kif għażiltu l-isem tal-band? 

Il-kelma Haine tfisser “mibegħda” bil-Franċiż u kienet magħżula apposta għas-saħħa emozzjonali tagħha. Madankollu, l-isem qatt ma kien maħsub biex jippromovi mibegħda jew ostilità lejn xi ħadd. Għall-kuntrarju, jirrappreżenta dawk l-emozzjonijiet intensi li ħafna drabi jinġemgħu ġewwa: rabja, frustrazzjoni, ansjetà, u l-bżonn li wieħed joħloq xi ħaġa pożittiva minn bidu mhux neċessarjament daqshekk pożittiv. 

Il-mużika ta’ Haine tuża dawn l-emozzjonijiet bħala mezz ta’ espressjoni u rilaxx. Għalina, dan l-stil ta’ mużika b’saħħitha huwa forma ta’ terapija, spazju fejn tista’ tkun onest miegħek innifsek u mal-oħrajn. L-isem jirrifletti proprju dan: emozzjoni qawwija trasformata f’enerġija kreattiva. 

X’inhu l-iżjed proġett għal qalbkom? 

“Fertile Void” huwa bla dubju wieħed mill-aktar proġetti importanti fil-karriera ta’ Haine, peress li huwa l-ewwel full length album u jirrappreżenta livell ġdid ta’ maturità, kemm mużikalment, kif ukoll kunċettwalment. Madankollu, ma nħarsux lejh bħala bidu assolut jew bħala punt li jħassar dak kollu li ġie qabel. 

Is-singles u l-EP li ħriġna fis-snin preċedenti kienu essenzjali biex nibnu l-identità tagħna, biex nesperimentaw, u biex nifhmu min aħna bħala band. “Fertile Void” huwa r-riżultat ta’ dak il-vjaġġ kollu. Fl-istess ħin, bħalissa qed naħdmu fuq materjal ġdid li se jiġi maħruġ fl-2026, u nħossu li dan il-materjal juri progress qawwi, mhux biss fil-kompożizzjoni u l-ħoss, imma wkoll fil-mod kif nesprimu emozzjonijiet u temi aktar profondi. 

X’inhu l-pass li jmiss? 

Is-sena 2026 se tkun sena kruċjali għal Haine. L-iffukar se jkun fuq il-kitba u l-ħruġ ta’ materjal ġdid, b’singles li se jkomplu jibnu fuq il-pedamenti ta’ “Fertile Void” iżda fl-istess ħin jiftħu direzzjonijiet ġodda. Għalkemm aħna kburin ħafna bl-album, ma rridux nibqgħu mwaħħlin miegħu. 

Liema hi l-ikbar ispirazzjoni tagħkom? 

L-ispirazzjonijiet tagħna huma mifruxa fuq diversi ġeneri u xeni. Bands bħal Whitechapel, Shadow of Intent, Lorna Shore, Cabal, u Fit For An Autopsy kellhom impatt qawwi fuq il-mod kif nifhmu d-deathcore, mhux biss bħala mużika singolarment, imma bħala mezz narrattiv u emozzjonali. 

Ix-xena tal-mużika lokali hija waħda li toffri ħafna opportunitajiet lill-artisti li għadhom jibdew? 

Ix-xena metal Maltija bħalissa tinsab f’mument interessanti ħafna. Qed naraw ħafna mużiċisti żgħażagħ, bands ġodda, u enerġija friska li qed tagħti ħajja ġdida lix-xena. Dan jagħmilha ambjent fertili, fejn hemm ħafna potenzjal għat-tkabbir u l-kollaborazzjoni. 

B’dan f’moħħna, Haine torganizza wkoll l-avveniment annwali Haine and Friends, fi żmien il-Milied. L-għan huwa li jinħolqu spazji fejn mużiċisti żgħażagħ jistgħu jaqsmu l-palk ma’ oħrajn aktar esperjenzati, jitgħallmu minn xulxin u jħalltu fanbases differenti. Aħna nemmnu li xena tibqa’ b’saħħitha biss jekk tkun miftuħa għall-ġdid u mhux intimidata minnu. 

Kieku tistgħu tbiddlu xi ħaġa fix-xena mużikali Maltija, xi tkun? 

Nixtiequ naraw aktar rikonoxximent u appoġġ strutturat għall-mużika oriġinali lokali, speċjalment għal ġeneri alternattivi u estremi. Aktar venues, aktar inizjattivi u aktar investiment fit-talent lokali jistgħu jagħmlu differenza kbira biex ix-xena tkompli tikber b’mod sostenibbli. Fl-istess ħin, nifhmu u napprezzaw il-fatt li f’dawn l-aħħar snin infetħu diversi skemi u inċentivi governattivi li qed jagħtu aktar opportunitajiet lill-artisti lokali u lil kull forma ta’ mużika. 

Ix-xena lokali tal-metal għandha firxa wiesgħa ta’ bands ta’ livell għoli li potenzjalment jistgħu jagħmlu suċċess barra minn Malta. Madankollu, ħafna drabi dawn il-bands mhumiex kompletament attrezzati biex jieħdu dak il-pass ’il barra. Bħala gżira żgħira, l-ispejjeż tal-ivvjaġġar, il-loġistika u t-touring huma kważi impossibbli biex jinġarru waħedhom. Għalhekk, ikun fl-interess tal-pajjiż li jkun hemm aktar appoġġ, mhux biss biex jiġu organizzati gigs u avvenimenti lokalment, iżda wkoll biex jinħolqu opportunitajiet għal tours jew skemi ta’ wirjiet barra minn Malta fuq skala akbar. 

Fl-aħħar mill-aħħar, nemmnu li l-akbar saħħa tax-xena mużikali Maltija tibqa’ l-komunità tagħha.