Naħliflek: it-taqtigħa ta’ Artemisia Gentileschi għall-verità u l-ġustizzja tingħata l-ħajja

Mit-traskrizzjonijiet eżistenti tal-qorti Rumana, toħroġ l-istorja ta’ ġlieda ta’ mara li tmur kontra l-kurrent biex tikxef il-verità. F’Ottubru, l-istorja vera tal-pittriċi Artemisia Gentileschi, storja ta’ attakk, tradiment, u trijonf, tiżvolġi bħal qatt qabel f’‘Naħliflek’, ta’ Breach Theatre. 

B’direzzjoni ta’ Marta Vella, u bil-protagonisti Kim Dalli, Clare Agius, u Sarah-Lee Zammit, id-dramm teatrali ‘Naħliflek’ se jsir fil-knisja pittoreska tal-Madonna tal-Pilar, fil-Belt Valletta. 

Imtella’ għall-ewwel darba bil-Malti, segwi kif il-każ li dam seba’ xhur tal-pittriċi ikonika Barokka u tal-moviment ta’ Caravaggio, li saħħret lil Ruma kollha, hu rrakkontat permezz ta’ din il-produzzjoni milqugħa tant tajjeb, li tgħaqqad il-kummentarju mitiku, storiku, u kontemporanju biex tingħad din l-istorja b’saħħitha tal-mara wara l-pitturi ta’ ġenerazzjoni. 

‘Naħliflek’ hi tradotta minn Kim Dalli, bi produzzjoni ta’ Daniel Azzopardi, u bis-sehem tal-artisti Claire Tonna u Analise Mifsud. ‘Naħliflek’ se tittella’ mill-Ġimgħa 17 sal-Ħadd 26 ta’ Ottubru 2025, u se tittella’ bil-Malti, bi spettakli li se jkollhom sopratitli bl-Ingliż il-Ħadd 19 u l-Ġimgħa 24 ta’ Ottubru 2025.