André Rieu jirritorna Malta wara suċċess fenomenali fl-ewwel darba li ġie fost il-Maltin

 L-Awtorità Maltija għat-Turiżmu bi kburija tħabbar ir-ritorn tal-vjolinista u direttur magħruf mad-dinja kollha André Rieu, akkumpanjat mill-famuża Johann Strauss Orchestra, għal żewġ kunċerti straordinarji fil-miftuħ fil-Fosos storiċi tal-Furjana, fid-29 u t-30 ta’ Awwissu 2025. 

Din se tkun it-tieni żjara tal-Maestro Rieu f’Malta, tant li għal darb’oħra se jaffaxxina eluf ta’ partitarji bit-taħlit uniku tiegħu ta’ mużika klassika, divertiment, u spettaklu. 

Il-kunċerti, li se jinkludu wkoll esebizzjoni speċjali minn Los del Río, magħrufa għall-kanzunetta “Macarena”, u minn numru ta’ solisti internazzjonali, iwiegħdu li jkunu fost il-mumenti kulturali l-aktar memorabbli tal-2025. 

Filwaqt li ħafna spettakli internazzjonali bħalissa qed isiru ġewwa fi spazji magħluqa, Malta tibqa’ waħda mill-ftit destinazzjonijiet li toffri lill-udjenzi l-esperjenza unika ta’ kunċerti spettakolari fil-miftuħ, u b’hekk tkompli ssaħħaħ ir-reputazzjoni tagħha bħala ċentru kulturali vibranti. 

Kmieni dalgħodu, il-President tal-Awtorità Maltija għat-Turiżmu żar il-palk tal-Fosos qabel il-kunċerti tant mistennija. Akkumpanjat mis-Sur Charles Magro, Direttur Maniġerjali ta’ TEC Ltd, l-organizzaturi tal-avveniment, ingħata tour esklussiv tas-sistema tal-produzzjoni, u ra b’għajnejh l-iskala kbira ta’ preparazzjoni għal dan l-avveniment ta’ klassi dinjija. B’aktar minn 100 artist fuq il-palk, Malta hija lesta tilqa’ esperjenza mużikali li ma tintesiex, kemm għall-Maltin, kif ukoll għall-eluf ta’ viżitaturi internazzjonali li se jaslu għall-okkażjoni. 

Dwar l-avveniment, Dr Charles Mangion, President tal-Awtorità Maltija għat-Turiżmu qal: “Aħna onorati li nilqgħu lil Maestro André Rieu u lill-orkestra tiegħu lura Malta. L-iskala ta’ din il-produzzjoni, fil-Fosos tal-Furjana fil-Belt Valletta, toffri esperjenza darba f’ħajja. Malta tkompli tpoġġi lilha nnifisha bħala destinazzjoni ewlenija għal spettakli ta’ livell dinji, u aħna kburin li nkunu parti minn dawn il-kisbiet.”  

B’aktar minn 130 kunċert kull sena madwar id-dinja, André Rieu jkompli jaffaxxina lill-udjenzi bil-passjoni tiegħu għall-mużika. Ir-ritorn tiegħu f’Malta jirrifletti l-apprezzament profond tiegħu lejn il-gżejjer u l-udjenzi tagħhom. Il-Johann Strauss Orchestra, magħrufa għall-prestazzjonijiet vibranti u l-ispirtu ferrieħi tagħha, taqsam l-imħabba ta’ Rieu għal Malta, u jqisuha bħala waħda mid-destinazzjonijiet favoriti tagħhom fejn jagħmlu l-kunċerti.