The Italian Tenors għall-ewwel darba f’Malta fi spettaklu maestuż fil-MCC

Wara suċċess enormi fid-dinja kollha matul it-tour Ewropew tagħhom li kien sold-out, it-trio Taljan magħruf bħala The Italian Tenors se jtellgħu spettaklu għall-ewwel darba f’Malta. L-avveniment, li jifforma parti mit-Tour Dinji 2024 tagħhom, se jsir fil-Mediterranean Conference Centre. 

Luca Sala, Sabino Gaita, u Evans Tonon huma t-tliet artisti li, bil-vuċijiet tagħhom ispirati minn tradizzjonijiet klassiċi, se jwasslu serata maġika li tgħaqqad melodiji rinomati, klassiċi, Naplitani, u interpretazzjonijiet emozzjonanti tal-mużika popera. Dan kollu se jkun akkumpanjat minn band live. 

L-udjenza tista’ tistenna li tisma’ xogħlijiet ikoniċi bħal “Caruso” ta’ Lucio Dalla, “Con Te Partirò” ta’ Andrea Bocelli, kanzunetti Taljani popolari tas-sittinijiet, kif ukoll kanzunetti favoriti Naplitani u hits internazzjonali bħal “Gloria” u “Mamma Maria”. Barra minn hekk, se jinkludu wkoll noti mill-isbaħ mill-opri famużi ta’ Verdi u Puccini, b’interpretazzjonijiet li se jieħdu lill-udjenza fuq vjaġġ mil-La Scala f’Milan sal-Opera ta’ Ruma, u mill-Arena ta’ Verona sal-Kolossew. 

The Italian Tenors huma magħrufin għall-kapaċità tagħhom li jgħaqqdu l-mużika pop mal-klassiċi, u jinterpretaw kanzunetti Taljani magħrufa flimkien ma’ melodiji operistiċi b’mod uniku. It-talent tagħhom ġie deskritt bħala “brillanti, notevoli, u eċitanti” minn bosta u l-udjenza f’Malta għandha tistenna spettaklu li jqajjem emozzjonijiet  u jħalli memorji li jdumu għomor. 

Din is-serata hija opportunità irripetibbli biex tesperjenza l-maġija tal-mużika Taljana fl-aqwa tagħha. Biljetti huma diġà disponibbli u mistennija jittieħdu malajr, hekk kif il-popolarità tat-trio tkompli tikber fuq livell internazzjonali. 

Tkunx nieqes minn dan l-avveniment straordinarju li joffri kollox: minn passjoni vokali għal divertiment artistiku li jqanqal ir-ruħ.