Kummiedja u dramm f’lejl wieħed fit-Teatru Dumnikan fil-Birgu

Lejl indimentikabbli teatrali qed jistenniek fit-teatru Dumnikan tal-Birgu, grazzi għall-kollaborazzjoni bejn The Acting Coach u Dots Media.  

Is-serata tibda’ b’kummiedja divertenti miktuba minn Patrick Vella, li jieħu r-riedni wkoll bħala d-direttur. 

“Dawk it-Tlieta ta’ fuq il-Bank” hija produzzjoni li ssegwi d-diżavventuri ta’ tliet erwieħ mitlufa li qed jistennew il-ġudizzju fil-purgatorju.  

Madankollu jitfaċċaw ostakli mhux mistennija u bil-kaos li jinħoloq, l-udjenza tispiċċa tiddubita l-wasla tad-destin.  

Din il-prestazzjoni se tingħata l-ħajja grazzi għat-trio dinamiku Mario Gatt, Shawn Ciantar, u Joseph Fenech bħala l-erwieħ imħawda, u l-anġlu Evelyn White, interpretat mill-bravissima Frances Galea. 

Wara vjaġġ ta’ daħk u sorpriżi nagħtu l-ġenb din il-prestazzjoni, u l-udjenza taffaċċja dramm ta’ Stefan Galea Debono.  

Immexxi minn Galea Debono nnifsu, “Fil-Kamra tal-Purtiera Vjola” jidħol fil-kumplessitajiet tan-natura umana u jesplora temi ta’ ambizzjoni, tradiment, u korruzzjoni.  

B’kast li jinkludi lil Aaron Fenech, Stefania Attard Vella, Chris Camilleri, u Tyler Loffreda, din in-narrattiva se tittrasporta lill-ispettaturi f’dinja fejn kull deċiżjoni ġġib magħha konsegwenzi profondi.  

Titlifx iċ-ċans tiegħek li tara l-maġija tat-teatru fl-aqwa tagħha.  
Ibbukkja biljett għall-24, 25, u 26 ta’ Mejju fit-Teatru Dumnikan fil-Birgu.  
Il-biljetti huma disponibbli minn www.ticketline.com.mt.