L-ikla t-tajba

Insalata Mediterranja

bi dressing tat-tadam imqadded

Ingredjenti:

Insalata mħallta (ħass, rukola, spinaċi...)

• 2 tadam
• ½ ħjara
• ½ basla vjola
• 100g ġobon feta

Poġġi l-insalata fil-qiegħ ta’ skutella u itfa’ fuqhom saff saff ta’ tadam, basal u ħjar.   Farrak il-ġobon feta fuq kollox, u xerred id-dressing fil-wiċċ.

Għad-dressing:

• ½ kikkra tadam imqadded
• 2 imgħaref ħall balsamiku
• ½ kikkra żejt mit-tadam imqadded

Poġġi t-tadam imqadded fi skutella u bi blender itħan ftit sakemm jiġu f’biċċiet iżgħar. Ħawwad u żid il-ħall balsamiku, u kompli ħawwad b’furketta. Żid iż-żejt u kompli ħawwad. 

Dan id-dressing tista’ żżommu fil-friġġ sa ġimgħa, u tuża biss kemm għandek bżonn.

Tista’ tieħu din l-insalata waħedha, iżżidilha biċċiet tat-tiġieġ, ħut jew laħam jew inkella bħala kontorn għal mal-platti tiegħek.

Torta quiche bil-ġbejniet

Ingredjenti:

• Għaġina short crust
• 2  kurrat imqatta’ (jew basliet)
• 2 bajdiet
• ½ kikkra ħalib
• ½ kikkra krema friska
• 2 imgħaref stragun jew chives imqatta’
• ½  kuċċarina melħ u bżar
• ¾ kuċċarina noċemuskata
• 60g ġbejniet friski mfarrkin

Metodu:

1. Iftaħ l-għaġina fuq dixx u taqqab b’furketta. Aħmiha waħedha għal madwar kwarta f’temperatura ta’ 200°C. Baxxi t-temperatura għal 180°C.
2. Sadanittant, għalli fti ilma f’borma u żid il-kurrat sakemm jirtabu għal madwar 5 minuti. Saffihom u ħalli f’ġenb.
3. Fi skutella kbira ħabbat flimkien il-bajt, ħalib, krema stragun, bżar, melħ u noċemuskata.
4. Fil-qiegħ tal-għaġina ifrex il-kurrat imsaffi, u farrak il-ġbejniet fuqha. Ferra’ t-taħlita tal-bajd fl-għaġina u aħmi sakemm tintefaħ u tiħmar xi ftit, madwar 40-50 minuta. 

Gallettini tal-lumi

Ingredjenti:

• 2 kikkri dqiq
• 2 kuċċarini baking poder
• ½ kuċċarina melħ
• 150 butir artab
• Kikkra + 2 magħref zokkor
• 1 magħrfa qoxra tal-lumi
• 1 bajda 
• 1 isfar tal-bajd
• 2 magħref meraq tal-lumi
• ½ essenza tal-vanilla
• Ftit qtar kulur isfar (jekk trid)
• ½ kikkra icing sugar

Metodu:

1. Saħħan il-forn għal 180°C. 
2. Fi skutella kbira ħawwad flimkien id-dqiq, baking powder u melħ.
3. Fi skutella oħra, ħabbat flimkien il-butir, zokkor u qoxra tal-lumi, bl-għajnuna ta’ food processor, sakemm it-taħlita tibjad. 
4. Żid il-bajda u l-isfar tal-bajd u ħawwad. Kompli żid il-meraq tal-lumi, il-vanilla u l-kulur jekk tkun se tuża. Ħawwad kollox u bil-mod żid it-taħlita tal-ingredjenti nexfin sakemm jitħallat kollox flimkien.
5. Poġġi l-icing sugar fi skutella żgħira. Ħu parti mit-taħlita, daqs ta’ kuċċarina u rembel  b’idejk f’forma ta’ ballun u poġġi fl-iskutella bl-icing sugar sakemm tinkesa kompletament.
6. Poġġi fuq dixx b’karta strazza u poġġihom daqsxejn separati minħabba li jinfetħu. Aħmi f’forn imsaħħan għal madwar 10-13-il minuta.