Il-Prim Ministru Robert Abela tenna l-impenn ta’ Malta favur l-ugwaljanza waqt laqgħa tal-UN dwar id-drittijiet tal-persuni LGBTIQ, b’enfasi fuq l-isfidi li jaffaċċjaw iż-żgħażagħ.
Hu saħaq li minkejja li l-Karta tal-UN tiggarantixxi d-drittijiet għal kulħadd, ħafna żgħażagħ għadhom jesperjenzaw esklużjoni u bullying minħabba l-ġeneru tagħhom.
Abela fakkar fir-riformi li saru f’Malta permezz ta’ edukazzjoni inklużiva, inizjattivi komunitarji u ħolqien ta’ spazji siguri, iżda rrikonoxxa li sfidi bħall-diskors ta’ mibegħda online u l-aċċess għall-appoġġ mentali għadhom jeżistu. Huwa temm billi sejjaħ għal azzjoni kollettiva biex kull żagħżugħ u żagħżugħa jgħixu b’dinjità u b’kburija.
Ekonomija globali sostenibbli
Il-Prim Ministru indirizza wkoll is-Summit dwar “Sustainable, Inclusive and Resilient Global Economy”, fejn tkellem dwar il-ħtieġa li l-pajjiżi li qed jiżviluppaw ikollhom aċċess aħjar għal self u għajnuna finanzjarja.
“Ladarba r-realtà ekonomika ta’ kuljum tal-familji Maltin tkompli titjieb, ir-responsabbiltà tagħna li nitkellmu f’isem in-nazzjonijiet li għadhom jiżviluppaw tibqa’,” qal Abela. Huwa żied li din l-għajnuna trid tasal għand in-nies u tħalli impatt fuq ħajjithom ta’ kuljum.
Laqgħa ma’ Amazon
Waqt laqgħa oħra fl-Ambaxxata Maltija fi New York, il-Prim Ministru Abela ltaqa’ ma’ delegazzjoni mill-kumpanija globali Amazon. Id-delegazzjoni kienet magħmula mill-Viċi President ta’ Amazon Susan Pointer u d-Direttur ta’ Amazon Web Services (AWS) Franco Spicciariello. Abela kien akkumpanjat minn Col. Mark Mallia, Kap tas-Segretarjat fl-Uffiċċju tal-Prim Ministru.
Abela qal li l-viżjoni Malta 2050 qed tattira interess ġdid lejn pajjiżna u qed toħloq opportunitajiet biex kumpaniji ewlenin jersqu eqreb lejn l-ekosistema tan-negozju u t-teknoloġija ta’ Malta.
Min-naħa tagħha, Amazon – permezz tad-diviżjoni tal-cloud tagħha AWS – wriet interess qawwi li ssaħħaħ ir-relazzjoni tagħha ma’ Malta. AWS diġà sservi numru ta’ klijenti Maltin u semmiet programmi għal start-ups u ħiliet diġitali bħala oqsma ta’ benefiċċju potenzjali għal pajjiżna.
Ir-rappreżentanti ta’ Amazon enfasizzaw ukoll kif il-viżjoni Malta 2050 tikkoinċidi mal-istrateġija fit-tul ta’ AWS u kif ambjent regolatorju b’saħħtu jista’ jiġbed u jikber l-investiment.
