Jiddispjaċini li ma libistx suit silver, Briffa jitfa' botta lil Caruana
Il-preżentatur Ron Briffa ħareġ jikkritika d-deċiżjoni li jitwaqqaf il-programm tiegħu tal-Ġimgħa filgħaxija fuq PBS, u staqsa għaliex dan ġie sostitwit mill-programm il-ġdid tal-podcaster Ricky Caruana
minn Ilenia Debono
Il-programm ta’ divertiment ta’ Briffa, XOW, li kien jixxandar il-Ġimgħa filgħaxija, issa ġie sostitwit mill-programm il-ġdid ta’ Ricky Caruana li jibda fit-3 ta’ Ottubru. Għadu mhux magħruf dwar xiex se jkun il-programm ta’ Caruana, iżda skont ħjiel ippubblikati fuq il-paġna tiegħu ta’ Facebook, se jkun “programm ta’ dibattitu serju”.
Għalkemm ma semmiex lil Caruana direttament, il-kummenti ta’ Briffa kienu ċari għal kulħadd.
“Jiddispjaċini li ma lbistx suit silver waqt il-programm, ma kontx qed nimxi mal-moda. Jiddispjaċini li kont qed nippreżenta ma’ Jacqui Losco u mhux ma’ ħanżir... għax hekk jitħoqqilhom il-views. Paċenzja.” qal Briffa.
Il-preżentatur b’esperjenza qal li dejjem għamel l-almu tiegħu biex jagħti lill-udjenza programm li jgawdu, minkejja l-kritika fuq il-paġna ta’ Facebook 'Are you being served?' li sejħitlu “nejk u qżież”.
“Grazzi ta’ kull messaġġ, ta’ kull kumment, ta’ kull kritika kostruttiva, u fuq kollox, għall-appoġġ kollu li dejjem urejtulna,” żied jgħid.
Briffa, minkejja li fetaħ il-post tiegħu jgħid li XOW ma kienx se jirritorna fuq l-iskrins tat-televiżjoni, ta ħjiel li jista’ jkun hemm ritorn, meta staqsa lis-segwaċi jekk kinux se jibqgħu mqajmin sal-10:15pm ta’ Ġimgħa.
“Ftit paċenzja… aħjar tard milli qatt!” qal hu.
F’dak li jista’ jiġi interpretat bħala risposta lil Briffa, f’post fuq Facebook li issa tħassar, Caruana kien pront weġiblu bi kliem ta’ sfida, u qal li l-għira "toħorġok ta' ħmar.
“Kontra l-verità ma jirbaħ ħadd” żied jgħid.
