DIRETT | Illum jibda il-kontroeżami ta’ Keith Schembri
Il-ġuri ta' Yorgen Fenech dwar il-qtil ta' Daphne Caruana Galizia jkompli llum b'fażi ġdida tax-xhieda hekk kif l-avukati ta' Fenech mistennija jibdew il-kontroeżami tagħhom ta' Keith Schembri, wara li l-Prosekuzzjoni għalqet il-mistoqsijiet tagħha lbieraħ.
30 ta' Lulju 2026 08:27
minn Jaelle Borg
minn Jaelle Borg
Jaelle Borg hija ġurnalista ma' din il-gazzetta kif ukoll ġurnalista tal-qorti u tinsab ...
More in Qrati u Pulizija
Qabel ma Keith Schembri jerġa' jitla' fuq il-pedana tax-xhieda, il-Qorti tisma' lix-xhud Sami Harmionen, espert tal-forensika diġitali mal-Europol.
Il-Prosekuzzjoni tirreferih għall-ewwel rapport tiegħu, li jittratta l-estrazzjoni forensika ta' data minn diversi apparati elettroniċi elevati waqt l-inkjesta li saret fit-22 ta' Diċembru 2017 f'razzett fil-Mosta.
Harmionen jikkonferma wkoll it-tieni rapport tiegħu, relatat mal-estrazzjoni ta' aktar data minn apparati elevati minn appartament f'San Pawl il-Baħar, li kien marbut ma' wieħed mill-aħwa Degiorgio.
Il-Fondazzjoni Daphne Caruana Galizia ġeddet is-sejħa tagħha biex jiġu implimentati r-rakkomandazzjonijiet tal-inkjesta pubblika dwar il-qtil tal-ġurnalista.
Fi stqarrija fuq il-midja soċjali hekk kif ikompli l-ġuri ta' Yorgen Fenech, il-Fondazzjoni qalet li l-proċeduri fil-Qorti qed juru "f'ħin reali" kif il-korruzzjoni u l-influwenza wasslu għall-assassinju ta' Daphne Caruana Galizia.
Il-Fondazzjoni sostniet li l-ġustizzja ma tieqafx bil-kundanna ta' dawk responsabbli mill-qtil, iżda teħtieġ ukoll l-implimentazzjoni tar-rakkomandazzjonijiet tal-inkjesta pubblika biex tissaħħaħ is-saltna tad-dritt, tiġi indirizzata l-kriminalità organizzata u jingħataw aktar protezzjoni l-ġurnalisti.
Hija żiedet li ħafna mir-rakkomandazzjonijiet tal-inkjesta pubblika għadhom ma ġewx implimentati u appellat lill-Gvern biex iwettaqhom.
https://www.instagram.com/p/DbZ8SLOjS18/?img_index=1
llum il-ġuri jidħol f'fażi ġdida hekk kif Keith Schembri mistenni jiffaċċja l-kontroeżami mill-avukati ta' Yorgen Fenech, wara li l-Prosekuzzjoni għalqet il-mistoqsijiet tagħha wara ħamest ijiem ta' xhieda.
Fis-seduta tal-bieraħ, Schembri qal lill-ġurati li kien "ixxukkjat" meta Fenech beda jimplikah fil-qtil u li mar għand l-eks Prim Ministru Joseph Muscat biex joffrilu r-riżenja tiegħu.
Huwa ċaħad ukoll sensiela ta' allegazzjonijiet li tressqu quddiemu mill-Prosekuzzjoni, fosthom li kien ta struzzjonijiet lil Fenech biex jinstab mod kif tinqatel Caruana Galizia.
Schembri baqa' miżmum b'ordni tal-Qorti matul il-lejl u mistenni jerġa' jitla' fuq il-pedana tax-xhieda dalgħodu.
Dalgħodu qabel jitla fuq il-pedana Schembri, ser nisimgħu xi xhieda minn Europol
Segwu magħna għal kull żvilupp mill-awla matul il-ġurnata.