Turist ta’ 18-il sena ngħata sentenza sospiża u multa wara li fl-aħħar jum tal-vaganza tiegħu f’Malta, ħareġ għarwien fl-Isla.
Sean Graham Purves, turist Skoċċiż li kien fuq btala ma’ grupp ta’ ħbieb, ingħata sentenza ta’ xahar ħabs sospiża għal tliet xhur u multa ta’ €100 wara li deher miexi għarwien fi Triq Sant Anġlu, l-Isla, għall-ħabta tal-10 ta’ filgħodu.
Wara li sar rapport ġewwa il-Kunsill Lokali tal-Isla, il-filmati tal-inċident ġew mgħoddija lill-pulizija. Huwa ġie arrestat aktar tard fir-residenza li deher dieħel fiha.
Quddiem il-Maġistrat Monica Vella, Purves ġie akkużat li wettaq reat kontra d-diċenza u l-morali permezz ta’ att f’post pubbliku, kif ukoll li espona ruħu għarwien.
Huwa ammetta għall-akkużi kollha miġjuba kontrih.
L-avukat tal-għajnuna legali Martina Herrera spjegat li din kienet “ċajta għall-aħħar jum tagħhom f’Malta” u li ma kien hemm l-ebda intenzjoni ħażina.
L-akkużat mistenni jirritorna lura lejn l-Iskozja llum stess.
Il-qorti nnutat li, minkejja li l-att sar bħala ċajta, huwa kellu jifhem li kellu jaċċetta l-konsegwenzi tal-għemil tiegħu.
Il-qorti osservat ukoll li, għalkemm Purves għandu biss 18-il sena, f’din l-età wieħed jitqies bħala adult quddiem il-liġi.
Għaldaqstant, huwa ġie kkundannat għal sentenza ta’ xahar ħabs sospiża għal tliet xhur u multa ta’ €100.
L-Ispettur Kurt Farrugia mexxa l-prosekuzzjoni.
.png)
