Il-Pulizija arrestat lil John Cassar, ta’ 47 sena, fuq suspett li qatel lil ommu u darab serjament lil missieru waqt attakk fid-dar tal-familja fl-Imqabba l-Ħamis waranofsinhar.
Għalkemm il-Pulizija għadha ma kkonfermatx formalment li s-suspettat huwa bin il-vittmi, sorsi qrib l-investigazzjoni qalu lil MaltaToday li r-raġel huwa John Cassar, ħaddiem fil-kostruzzjoni.
Cassar huwa ħu Roderick Cassar, li kien ikkundannat 40 sena ħabs għall-qtil tal-eks mara tiegħu.
Kelliem għall-Pulizija qal li l-każ ġie rrappurtat għall-ħabta tas-2.15pm. John Cassar kien ħarab minn fuq il-post qabel ma nqabad mill-Pulizija madwar siegħa wara.
Il-kelliem qal li r-raġel ma rreżistiex l-arrest, iżda ttieħdu prekawzjonijiet minħabba li kien hemm suspett li seta’ kien armat.
Matul il-ħin li kien għadu qed jiġi mfittex, fuq il-kont ta’ Facebook ta’ Cassar dehru diversi messaġġi ġodda b’allegazzjonijiet fil-konfront ta’ terzi, theddid u stqarrija li kien ġie ffrodat €7,000 mill-kont Revolut tiegħu.
F’wieħed mill-messaġġi, Cassar qal li kien maqful u armat.
Il-mara li tilfet ħajjitha hija Mary Grace Cassar, ta’ 72 sena. Skont il-Pulizija, hija nstabet mejta fil-kċina b’diversi ġrieħi minn oġġett bil-ponta.
Ir-raġel ferut huwa missier Cassar, ta’ 74 sena, li bħalissa qed jingħata l-kura fl-Isptar Mater Dei.
Huwa maħsub li r-raġel intlaqat b’tornavit, filwaqt li l-oġġett li ntuża biex inqatlet il-mara għad irid jiġi stabbilit permezz tal-awtopsja.
L-inċident ħoloq kommossjoni kbira fi Triq il-Belt Valletta, fejn kienu jgħixu l-ġenituri ta’ Cassar.
It-triq twassal għall-iskola primarja tal-lokalità, li kienet għadha kemm temmet il-ġurnata skolastika meta seħħ l-attakk.
L-investigazzjonijiet tal-Pulizija għadhom għaddejjin.