Il-kompilazzjoni tax-xhieda kontra Carmelo Ciantar, akkużat bid-doppju omiċidju ta’ Anthony Agius u Dennis Mifsud, kompliet l-Erbgħa waranofsinhar quddiem il-Maġistrat Astrid May Grima, b’xhieda dettaljata mill-espert forensiku tal-qorti Dr Mario Scerri.
Ciantar qed jaffaċċja akkużi ta’ qtil intenzjonat, ħruq, kif ukoll pussess irregolari ta’ arma tan-nar.
Dr Scerri rrakkonta kif kien ġie msejjaħ lejn Triq il-Kunċizzjoni, Baħrija, fejn saru l-ewwel eżamijiet fuq il-katavri qabel l-awtopsji.
L-awtopsja fuq Anthony Agius uriet li dan ġarrab tliet tiri—wieħed f’sidru, ieħor f'żaqqu u t-tielet f'għonqu. L-espert spjega li l-margini tal-feriti kienu “maħruqa”, indikazzjoni li t-tiri ma sarux minn distanza viċin ħafna. Agius miet minħabba ħsara interna severa.
Fir-rigward ta’ Dennis Mifsud, Scerri kkonferma li dan ġie milqut b’tir wieħed f'rasu, fuq in-naħa tal-lemin li laqat direttament il-moħħ.
Dr Scerri ppreżenta r-rapport tiegħu lill-investigaturi. Huwa kkonferma wkoll li fl-istess jum ġie msejjaħ jistħarreġ lill-akkuzat fil-Kwartieri Ġenerali tal-Pulizija, fejn sabu koerenti fil-mod kif wieġeb u ddeċieda li kien tajjeb biex jiġi interrogat, iżda ordna li jkun osservat kontinwament waqt id-detenzjoni tiegħu.
L-Ispettur Lydon Zammit ta spjegazzjoni ġenerali dwar il-parti tiegħu fl-investigazzjoni. Huwa qal li hu u uffiċjali oħra tas-CID irċevew informazzjoni dwar sparatura b’żewġ vittmi f’żona iżolata fil-limiti tar-Rabat u marru mill-ewwel fuq il-post.
Zammit spjega li kien tkellem ma’ Agnes Mifsud, il-partner ta’ dak iż-żmien tal-akkużat. Hija qaltu li qabel l-inċident, Ciantar kien ħareġ mid-dar b’shotgun. Aktar tard, irċeviet telefonata minnu fejn qalilha: “Qtiltlek il-fniek.”
L-investigaturi bdew jippruvaw isibu lill-akkużat, iżda Ciantar kien qed jagħti informazzjoni falza, fosthom li kien Birżebbuġa. Eventwalment ġie lokalizzat fil-parkeġġ tal-PAMA il-Mosta, fejn ġie arrestat u nfurmat bid-drittijiet tiegħu.
Taħt kontra-eżami, Zammit irrimarka li Ciantar esprima żewġ intenzjonijiet li jagħmel ħsara lilu nnifsu waqt li kien qed jiġi mfittex.
Il-każ ġie aġġornat għat-22 ta’ Jannar fid-9:10am.
Il-prosekuzzjoni kienet immexxija mill-avukat tal-Avukat Ġenerali Anthony Vella, assistit mill-Ispetturi Kurt Colombo Zahra, Wayne Camilleri u Cheyenne Mangion.
L-akkużat kien rappreżentat mill-avukati Franco Debono, Adreana Zammit, Anthea Bonnici Zammit u Francesca Zarb, waqt li l-familji tal-vittmi dehru permezz tal-avukati Mario Mifsud, Nicholas Mifsud, David Chetcuti Dimech u Jacob Magri.
