Ħabta bejn żewġ jet skis

Il-Pulizija qed tinvestiga inċident marittimu li seħħ ilbieraħ fil-Bajja tal-Balluta, fejn żewġ jet skis kienu involuti f’ħabta li wasslet biex żagħżugħ ta’ 18-il sena sofra ġrieħi serji.

L-inċident seħħ għall-ħabta tal-erbgħa u nofs ta’ waranofsinhar, meta l-awtoritajiet ġew infurmati li żagħżugħ, ta’ nazzjonalità Albaniża, kien ittieħed l-Isptar Mater Dei b’urġenza wara ħabta fuq il-baħar.

Minn investigazzjoni preliminari rriżulta li wara l-kollizzjoni, il-vittma ttieħed lejn l-art permezz ta’ dinghy, u minn hemm ġie trasportat l-isptar permezz ta’ ambulanza. L-istat tiegħu ġie ċċertifikat bħala wieħed serju.

Il-Pulizija għaddejja bl-investigazzjonijiet.