L-attivist u eks President ta’ Repubblika Robert Aquilina sostna li ġieli sab ruħu f’sitwazzjonijiet fejn persuni li ma jafhomx avviċinawh b’mod aggressiv fit-triq, allegatament minħabba li huma partitarji tal-Gvern.
Aquilina qal li dawn l-episodji huma konsegwenza ta’ tentattivi biex jiġi ppreżentat bħala persuna li ma jistħoqqilhiex rispett, u wissa dwar il-perikli li jistgħu jinħolqu meta l-attakki personali jsiru parti mid-diskors pubbliku.
Huwa kien qed jitkellem waqt programm irrekordjat minn qabel ta’ Andrew Azzopardi fuq CampusFM, ftit jiem wara li allega li eks surġent tal-Pulizija kien ħoloq u xerred xbieha tiegħu, iġġenerata bl-intelliġenza artifiċjali, bil-għan li jinsulentah.
L-attivist rabat dan l-episodju mal-mod kif il-ġurnalista Daphne Caruana Galizia kienet sfat fil-mira ta’ attakki u kampanji ta’ disprezz fis-snin u x-xhur ta’ qabel l-assassinju tagħha.
“Jarawni fit-triq u jiġu għalija bil-ponn magħluq”
Waqt l-intervista, Aquilina rrakkonta li ġarrab episodji fejn persuni li ma kellux kuntatt magħhom avviċinawh b’intenzjonijiet aggressivi.
Huwa sostna li dawn il-persuni kienu partitarji tal-Gvern u li r-reazzjoni tagħhom kienet influwenzata mill-mod kif hu jiġi ppreżentat fil-pubbliku.
Skont Aquilina, f’ċerti okkażjonijiet dawn avviċinawh bil-ponn magħluq u b’imġiba li huwa ddeskriva bħala vjolenti.
L-eks President ta’ Repubblika sostna li l-attakki li jnaqqsu d-dinjità ta’ persuna jistgħu joħolqu klima li fiha oħrajn jibdew iqisu l-aggressjoni bħala aċċettabbli.
Jirreferi għall-attakki kontra Daphne Caruana Galizia
Aquilina għamel paragun bejn dak li qed jesperjenza hu u l-kampanja ta’ attakki personali li kienet saret kontra Daphne Caruana Galizia qabel ma nqatlet fl-2017.
Huwa fakkar kif il-Ministru għall-Intern Glenn Bedingfield, li dak iż-żmien kien jikteb dwar il-ġurnalista fuq blog, kien iddefenda ċerti karikaturi tagħha bħala forma ta’ satira.
Madankollu, Aquilina rrimarka li l-inkjesta pubblika dwar l-assassinju tagħha ma kinitx qablet ma’ dik l-interpretazzjoni tal-attakki kontriha.
Bedingfield aktar tard kien skuża ruħu għall-kummenti u l-kitbiet tiegħu dwar il-ġurnalista.
Aquilina rrefera wkoll għall-konklużjonijiet tal-inkjesta pubblika dwar il-klima li fiha seħħ il-qtil, u sostna li dawk responsabbli ħassewhom f’pożizzjoni li setgħu jwettqu r-reat mingħajr ma jinqabdu.
Huwa argumenta li l-esperjenza ta’ Caruana Galizia għandha sservi ta’ twissija dwar il-konsegwenzi possibbli ta’ kampanji li jneħħu d-dinjità lil persuni li jesprimu kritika fil-pubbliku.
Jakkuża lil eks surġent b’ritratt maħluq bl-AI
Il-kummenti ta’ Aquilina segwew stqarrija li ħareġ l-Erbgħa li għadda, li fiha allega li eks surġent tal-Pulizija kien responsabbli għall-ħolqien u t-tixrid ta’ xbieha offensiva tiegħu permezz tal-intelliġenza artifiċjali.
Aquilina identifika lill-persuna li allegatament kienet involuta bħala Joseph Abela, ħu l-eks Imħallef Toni Abela u missier spettur tal-Pulizija.
Huwa sostna li l-informazzjoni dwar l-identità tal-persuna kienet ġiet ivverifikata mill-Pulizija.
Dawn jibqgħu allegazzjonijiet imressqa minn Aquilina.
Toni Abela: Il-libertà tal-espressjoni ġġib magħha responsabbiltajiet
Aktar kmieni fl-istess programm, Andrew Azzopardi tkellem ukoll ma’ Toni Abela, li huwa l-Kummissarju għall-Istandards tal-Ġudikatura.
Meta ġie mistoqsi dwar l-allegazzjonijiet li Aquilina għamel fil-konfront ta’ ħuh, Abela saħaq fuq l-importanza tal-libertà tal-espressjoni.
Madankollu, huwa sostna li dan id-dritt mhuwiex assolut u għandu jkun eżerċitat b’responsabbiltà.
L-eks Imħallef qal li ma setax jifhem għaliex ismu kellu jiddaħħal f’kontroversja li kienet tirrigwarda lil ħuh.
Huwa żied li l-libertà tal-kelma għandha tkun akkumpanjata mir-rispett lejn il-verità, filwaqt li persuni li jesprimu ruħhom fil-pubbliku għandhom jevitaw li jxerrdu gideb jew nofs veritajiet.
Min-naħa tiegħu, Azzopardi sfida lil Aquilina waqt l-intervista, filwaqt li rrimarka li kull persuna għandha d-dritt tesprimi l-opinjoni tagħha.
Id-diskussjoni ffukat fuq il-limiti bejn il-kritika, is-satira u l-attakki personali, kif ukoll fuq ir-responsabbiltà li ġġib magħha l-libertà tal-espressjoni.
