Raġel inħeles mill-akkużi li kisser proprjetà u li kien qed jgħix ħajja fit-triq, bil-qorti tikkritika lill-pulizija għall-investigazzjoni nieqsa tagħhom fil-każ.
Maxwell Joe, mil-Liberia, kien akkużat li kiser bieb ta’ residenza fiż-Żejtun fil-13 t’April. Ġie mressaq il-qorti jumejn wara.
Il-qorti ħelsitu mill-akkużi—li kienu jinkludu ħsara volontarja fuq proprjetà, li jgħix ħajja ta’ vagabond, ksur tal-paċi pubblika u reċidiva—għax il-pulizija ma ppreżentawx biżżejjed evidenza u l-qorti kellha dubji serji fuq il-verżjoni tal-prosekuzzjoni.
Skont ix-xhieda fil-qorti, l-inċident seħħ meta membru tal-familja sema’ lil xi ħadd iħabbat mal-bieb. L-omm tal-mara tax-xhud kienet tgħix fir-residenza maġenbha.
Wara li semgħet il-ħsejjes, marret fil-gallarija biex tiċċekkja x’inhu jiġri, u minn isfel, żewġt itfal qalu li raw raġel b’“kulur skur” jikser il-bieb. Dawn it-tfal qatt ma ġew identifikati jew interrogati mill-pulizija. Il-mara talbet lil zijuha biex imur jara, u t-tfal qalulu li l-persuna responsabbli kienet hemm. Ix-xhud mar jitlob lil raġel jitlaq, iżda dan ma riedx jitbiegħed.
Meta waslu l-pulizija fuq il-post, sabu lil Maxwell bilqiegħda fuq il-veranda tar-residenza b’ġrieħi evidenti f’rasu. Madankollu, ma ġiet ippreżentata l-ebda ċertifikat mediku, ritratti, jew evidenza forensika fil-qorti.
Il-qorti qalet li l-ispettur li mexxa l-investigazzjoni qatt ma żar is-sit u lanqas ma vverifika jekk il-ġrieħi kinux konsistenti mal-allegata aggressjoni jew mal-ħsara fuq il-bieb.
“Wasal iż-żmien li l-pulizija tad-distrett jingħataw taħriġ serju fuq kif jinġabret l-evidenza u kif issir investigazzjoni sħiħa. Inkella, ix-xogħol kollu jmur għar-riħ meta l-każ jasal il-qorti,” qalet il-Maġistrat Monica Vella.
Il-qorti enfasizzat li l-investigaturi għandhom ikollhom lista ċara li tiggwidahom fuq x’għandhom ifittxu, x’għandhom jippreservaw u kif għandhom jippreżentaw l-evidenza.
Maxwell qal li kien ġie mikri minn ċertu Anthony Spagnol biex jagħmel xogħol f’dar fil-viċinanzi u kien jgħix f’kamra qrib il-post. Hu sostna li kien qed jipprova jżomm brick waqt ix-xogħol, waqa’, laqat rasu u kien hu stess li ċempel lill-pulizija.
Il-ħsara fuq il-bieb kienet stmata għal €80.
Il-qorti nnutat li ħadd ma ra lil Maxwell effettivament jikkawża l-ħsara. Għall-pulizija, il-fatt li sabuh imweġġa’ barra l-bieb kien biżżejjed biex jiġi akkużat u meqjus ħati lil hinn minn kull dubju raġonevoli.
“Il-livell tal-investigazzjoni kien limitat ħafna. Għad hemm dubji dwar min verament ikkawża l-ħsara,” ikkonkludiet il-qorti.
