Il-pulizija tarresta suspettat traffikant tal-kokaina

Raġel ta' 37 sena, residenti x-Xgħajra, inqabad qed idaħħal id-droga fil-pajjiż hekk kif il-pulizija qabbduh b'seba' kilogrammi droga suspettata kokaina fil-karozza.

Ir-raġel kien qed isuq barra mill-Port Ħieles, fejn jaħdem, meta twaqqaf mill-pulizija. Apparti tfittxija fil-karozza tas-suspettat, saru tfittxijiet fil-Port Ħieles ukoll li sabu 28 kilogramma droga moħbija mir-raġel.

Il-valur totali tad-droga misjuba jammonta għal madwar €2 miljuni.

Mill-istħarriġ tal-pulizija joħroġ li d-droga waslet fil-pajjiż permezz ta' kontejner, fejn ir-raġel imbagħad ħbieha sabiex ikun jista' joħroġ ftit ftit mill-Port.

Il-Maġistrat Ian Farrugia fetaħ inkjesta fil-każ, u fl-istess ħin, l-investigazzjonijiet tal-pulizija għadhom għaddejjin.