Mara ta' 38 tisfa vittma f'inċident tat-traffiku

Omm ta' 38 sena tilfet ħajjitha f'inċident tat-traffiku fi Triq Birkirkara, San Ġiljan.

Skont stħarriġ tal-pulizija, Chantalle Gauci sfat vittma tal-inċident wara li l-karozza tagħha stess bdiet miexja b'lura u laqtitha. Bid-daqqa, Gauci spiċċat taħt il-vettura tagħha, fejn weġġgħat serjament.

Fil-karozza kien hemm it-tifla ta' sitt snin tal-vittma. It-tifla ma weġġgħatx bl-inċident u tinstab sħiħa. 

It-triq fejn seħħ l-inċident hija waħda wieqfa ħafna, u jidher illi l-vittma kienet toqgħod viċin tat-triq.

Fuq il-post issejjaħ tim mediku, iżda l-vittma ġiet iċċertifikata mejta fuq il-post.

Il-Maġistrat Anthony Agius Bonnici ħatar inkjesta flimkien ma' numru ta’ esperti biex jgħinuh.

Il-pulizija għadhom qed jinvestigaw l-inċident.