Il-Kap Nazzjonalista u tal-Oppożizzjoni Bernard Grech qal illi l-liġi mressqa mill-Gvern għall-ugwaljanza hija pass tajjeb imma mhijiex biżżejjed waħedha. "Aħna nemmnu li l-mara m'għandha bżonn lil ħadd biex timxi 'l quddiem u tipprogressa ... il-problema mhux li jiġu eletti, imma li jkunu jistgħu jiffunzjonaw. Ejjew nwittu l-ostakoli li għandhom in-nisa biex jidħlu fil-politika," qal Grech. Huwa sostna li sfortunatament, minkejja l-avvanzi li saru, għad hemm ħafna min jaħseb li d-dar u l-familja hija responsabilità tal-mara u allura staqsa kif se ngħinu lil dik il-mara li għandha l-karriera, tfal u dar u li tixtieq toħroġ għall-politika.
Għalhekk reġa' ppropona li d-deputati jsiru full time - sabiex il-Parlament ikun il-karriera professjonali tagħhom.
Grech qal ukoll li skont emenda tal-PN, il-PM għandu jkollu l-abbilità li jdaħħal lil uħud minn dawn in-nisa fil-Kabinett, filwaqt li fakkar illi din il-liġi għandha tgħodd ukoll għal nisa li jkunu kandidati ma' partiti oħrajn. "Ma nemmnux li din il-liġi taħdem biss jekk ikun hemm il-PN u l-PL fil-Parlament imma anke jekk ikun hemm partiti oħrajn."
"Kien diżappuntat li minkejja l-ħafna eloġji, il-Prim Ministru lbieraħ ma sabx il-kuraġġ li jikkongratula lil Roberta Metsola. Jigifieri lanqas f'din id-diskussjoni dwar in-nisa, il-PM ma kellu l-kuraġġ jikkongratula lil mara - li ġejja minn naħa l-oħra tal-ispettru politiku - li qed tagħmel suċċess għaliha u għal art twelidha," saħaq Grech. Il-PM Abela kien irrifjuta li jifraħ lil Metsola meta hi saret il-Viċi President tal-Parlament Ewropew.