Il-Fondazzjoni għal-Logħob Responsabbli (RGF) iffirmat grant agreement ma’ 21 organizazzjoni u individwi bħala parti mill-Corporate Social Responsibility Programme (CSRP).
Silvio Schembri, Ċermen tal-Fondazzjoni qali li llum il-ġurnata, kumpaniji u organizazzjonijiet ma jistgħux iwarrbu ċertu fatturi soċjali u ambjentali li tant huma għall-qalb il-klijenti jew dawk li jagħmlu użu mis-servizzi tagħhom. “Dawn tal-aħħar jistennew li l-kumpaniji u l-organizazzjonijiet iħallu impatt pożittiv fuq l-ambjent ta’ madwarhom. Proprju għal din ir-raġuni, l-RGF ser tkun qegħda tagħmel l-aspett soċjali prijorità u taħdem viċin ta’ kumpaniji u għaqdiet oħra sabiex jiġi mħares dan.”
Schembri stqarr li l-Fondazzjoni ħarġet żewg sejħiet separati ta’ fondi, sejħa permanenti għall-fondi sa massimu ta’ 1000 ewro u sejħa temporanja għall-fondi sa massimu ta’ 6000 ewro. “B’kollox, 31 entità ssottomettew l-applikazzjoni għall-proġetti tagħhom mal-ewwel sejħa għall-fondi, 21 minnhom kienu eliġibbli għall-fondi. Il-proġetti jvarjaw minn Summer sports camp f’Għawdex għal kors ta’ tagħlim tal-ħjata fil-Faċilità Korretiva ta’ Kordin.”
Silvio Schembri temm jgħid li l-logħob tal-azzard ma għandux jiġi meqjus bħala attività li minnha wieħed jagħmel aktar flus iżda bħala attività ta rikreazzjoni.
