VisitMalta tappoġġja r-Rolex Middle Sea race 2026, avveniment prestigjuż tat-tbaħħir internazzjonali

Ir-Rolex Middle Sea Race hija appoġġjata mill-VisitMalt u hija waħda mill-aktar kompetizzjonijiet prestiġjużi tat-tbaħħir fuq distanzi twal fil-Mediterran. Il-ftuħ ta’ din it-tellieqa kien il-Port il-Kbir ta’ Malta fis-17 t’Ottubru hekk kif laqqgħet flimkien flotta internazzjonali għal waħda mill-aktar sfidi mistennija fil-kalendarju tat-tbaħħir.

VisitMalta tappoġġja din it-tellieqa bħala parti mill-impenn kontinwu tagħha lejn inizjattivi li jikkontribwixxu għall-offerta turistika ta’ Malta u jsaħħu l-attrazzjoni tal-Gżejjer lil hinn mill-istaġun tradizzjonali tas-sajf. Bil-parteċipazzjoni internazzjonali tagħha u r-reputazzjoni soda tagħha fi ħdan il-komunità tat-tbaħħir, din il-kompetizzjoni tifforma parti importanti mill-programm ta’ avvenimenti sportivi ewlenin ta’ Malta.

Il-Ministru għat-Turiżmu, l-Onor. Jo Etienne Abela, enfasizza li: “Din is-sena, ir-Rolex Middle Sea Race laqqgħet flimkien aktar minn 100 opra tal-baħar li rrappreżentaw 43 pajjiż, u b’hekk kompliet issaħħaħ il-pożizzjoni ta’ Malta fil-kalendarju internazzjonali tat-tbaħħir. Din hija kompetizzjoni importanti għal Malta, għaliex tattira turiżmu ta’ kwalità, iżżid il-viżibbiltà tagħna fix-xena internazzjonali, u turi l-wirt marittimu tagħna kif ukoll il-qawwiet tad-destinazzjoni tagħna. Dawn huma kollha elementi li jaqblu mal-istrateġija tagħna u mat-tip ta’ turiżmu li nkomplu nippromwovu. Turiżmu li joħloq valur filwaqt li jappoġġja l-viżjoni fit-tul ta’ Malta.”

“Il-Rolex Middle Sea Race hija appuntament annwali fil-Port il-Kbir uniku tagħna fil-Belt Valletta, li jattira bosta viżitaturi lejn Malta biex jaraw il-bidu ta’ din it-tellieqa prestiġjuża. Tiġbed ukoll l-attenzjoni tal-midja internazzjonali, u b’hekk tpoġġi fuq pjattaforma lil pajjiżna flimkien ma’ din it-tellieqa mill-aqwa għal udjenzi madwar id-dinja. Għalina huwa ta’ pjaċir li nippromwovu u nappoġġjaw din il-kompetizzjoni, u ngħinu biex niżguraw li tkompli tirnexxi filwaqt li nsaħħu aktar il-profil internazzjonali ta’ Malta fost udjenza sofistikata u ta’ livell għoli,” żied il-Kap Eżekuttiv tal-Awtorità Maltija għat-Turiżmu, Carlo Micallef.

L-edizzjoni tal-2026 intemmet biċ-ċerimonja tal-għoti tal-premjijiet li saret illum, is-Sibt 24 ta’ Ottubru, f’Dar il-Meidterran (MCC), fejn ġew rikonoxxuti l-kisbiet tal-ekwipaġġi li ħadu sehem f’din it-tellieqa impenjattiva.

Id-dgħajsa Django 7X, ta’ Giovanni Lombardi Stronati, rebħet it-titlu ġenerali, filwaqt li Black Jack 100 kisbet l-unuri għall-ewwel monohull li qasam il-linja finali, u b’hekk intemmet edizzjoni oħra ta’ din il-kompetizzjoni internazzjonali.

Ħajr lill-parteċipanti kollha għall-kisbiet tagħhom u għall-kontribut tagħhom lejn is-suċċess ta’ edizzjoni oħra ta’ dan l-avveniment prestiġjuż.