Jippruvaw jiftħu oqbra fiċ-Ċimiterju tal-Addolorata – tingħalaq kappella b’effett immedjat

Il-Patrijiet Dumnikani tal-Birgu ħadu d-deċiżjoni wara rapporti ta’ vandaliżmu u attentati biex jinfetħu oqbra fil-kappella

Il-Kappella tal-Konfraternità tal-Madonna tad-Duluri fiċ-Ċimiterju tal-Addolorata ngħalqet b’effett immedjat wara rapporti ta’ atti ta’ vandaliżmu u attentati biex jinfetħu oqbra li jinsabu fiha.

Dan tħabbar mill-Patrijiet Dumnikani tal-Birgu, li esprimew it-tħassib tagħhom dwar dawn l-inċidenti, filwaqt li saħqu li tali aġir juri nuqqas kbir ta’ rispett lejn il-mejtin.

Il-patrijiet wissew ukoll li dawn l-atti jistgħu joħolqu riskji għas-saħħa pubblika.

Fid-dawl ta’ dawn iċ-ċirkostanzi, il-kappella mhux se tibqa’ miftuħa għall-pubbliku bħalma kienet qabel, iżda se tkun tista’ tintuża biss għall-quddies organizzati minn gruppi partikolari, pellegrinaġġi parrokkjali jew komunitajiet reliġjużi.

Biex isiru dawn l-attivitajiet, se jkun meħtieġ il-permess minn qabel tal-Pirjol.

Il-Pirjol u l-Patrijiet Dumnikani appellaw għall-fehim u l-koperazzjoni tal-pubbliku, filwaqt li spjegaw li d-deċiżjoni ttieħdet biex titħares id-dinjità tal-kappella u r-rispett lejn dawk midfuna fiha.

More in Kronaka