Il-Prim Ministru Robert Abela esprima sodisfazzjon għall-qbil politiku milħuq bejn il-mexxejja Ewropej biex l-Ewropa jkollha rappreżentanza formali fit-taħditiet futuri dwar il-paċi fl-Ukrajna.
Fi tmiem laqgħa informali tal-mexxejja Ewropej f’Dublin, Abela sostna li dan il-pass jista’ jkun żvilupp importanti fl-isforzi diplomatiċi biex jintemm il-kunflitt bejn ir-Russja u l-Ukrajna.
Huwa fakkar li Malta ilha sa mill-bidu tal-gwerra tappella biex tinstab soluzzjoni permezz tad-djalogu u n-negozjati.
Skont il-qbil milħuq, il-Ġermanja, Franza, ir-Renju Unit, l-Italja u l-Polonja, li flimkien jiffurmaw il-grupp magħruf bħala l-E5, se jipparteċipaw fit-taħditiet flimkien mar-rappreżentanti tal-istituzzjonijiet Ewropej.
Il-Prim Ministru wissa li għadu kmieni wisq biex wieħed jgħid jekk dawn in-negozjati humiex se jwasslu għal ftehim ta’ paċi.
Minkejja dan, huwa qies il-kunsens bejn il-mexxejja bħala sinjal pożittiv, partikolarment wara kważi ħames snin ta’ gwerra li matulhom ma ntlaħaqx progress tanġibbli lejn soluzzjoni paċifika.
Is-summit f’Dublin iffoka wkoll fuq il-potenzjal tal-intelliġenza artifiċjali biex issaħħaħ il-kompetittività tal-Unjoni Ewropea u tgħin lill-ekonomiji tagħha jkunu aktar reżiljenti.
Il-mexxejja kellhom diskussjonijiet ma’ esperti fis-settur tat-teknoloġija, fosthom Arthur Mensch, il-Kap Eżekuttiv tal-kumpanija Mistral AI.
Waqt dawn it-taħditiet, Abela enfasizza li l-iżvilupp ta’ teknoloġiji dejjem aktar avvanzati ma jistax, waħdu, jiggarantixxi benefiċċji ekonomiċi u soċjali.
Huwa argumenta li biex l-intelliġenza artifiċjali tintuża b’mod effettiv, jeħtieġ li jkun hemm nies bil-ħiliet meħtieġa, fiduċja mill-pubbliku u istituzzjonijiet li kapaċi jappoġġjaw l-adozzjoni tagħha.
Il-Prim Ministru għalhekk saħaq li l-investiment fit-teknoloġija għandu jkun akkumpanjat minn investiment fil-kapaċitajiet umani u mill-appoġġ istituzzjonali meħtieġ biex l-Ewropa tkun tista’ tisfrutta l-opportunitajiet li toffri l-AI.
