Il-Ministru tal-Kultura Malcolm Paul Agius Galea mhux se jirriżenja minkejja s-sejħiet biex iwarrab mill-kariga wara l-kontroversja li qamet dwar il-kummenti tiegħu fuq l-arti u l-libertà tal-espressjoni artistika.
F’kummenti lill-midja MaltaDaily, il-Ministru ammetta li seta’ esprima ruħu b’mod aħjar u li kliemu seta’ nstema’ insensittiv għal xi persuni, fosthom artisti li jaħdmu fis-settur.
Madankollu, huwa sostna li se jerfa’ r-responsabbiltà politika billi jkompli jaħdem aktar għall-qasam kulturali.
“Kulħadd jaf kif nitkellem. Iva, nammetti li stajt instmajt insensittiv, u d-diskors tiegħi seta’ weġġa’ lil xi nies, fosthom artisti li jaħdmu fis-settur,” qal Agius Galea.
“L-intenzjoni kienet li nipprovoka ideat ġodda”
Il-Ministru spjega li l-kummenti kontroversjali kienu saru waqt diskors f’laqgħa magħluqa, li għaliha kienu attendew diversi ħassieba kkonsultati mill-Ministeru biex jgħinu fit-tfassil tal-politika kulturali.
Skont Agius Galea, l-għan tiegħu kien li jisfida lill-parteċipanti u jqanqal diskussjoni li twassal għal ideat ġodda.
Huwa rrikonoxxa, iżda, li l-mod kif wassal il-messaġġ tiegħu seta’ kien aħjar.
“Ejja nkunu maturi. Id-diskors kien dak li kien, u stajt għedtu aħjar. Ġenwinament stajt esprimejt ruħi aħjar,” sostna.
Il-Ministru qal dan f’parti oħra tar-risposta tiegħu li ma dehritx fil-filmat ippubblikat, hekk kif il-filmat inqata’ qabel ma wasal għal dan il-punt.
“Se nwieġeb billi naħdem aktar”
Agius Galea qal li l-kontroversja kompliet tfakkru fir-responsabbiltajiet li għandu bħala Ministru tal-Kultura.
“Għandi responsabbiltà, u rrealizzajt aktar kemm għandi responsabbiltà. Se nerfa’ dik ir-responsabbiltà b’aktar ħidma,” qal.
Huwa saħaq li qed jaħdem għall-persuni kollha involuti fis-settur kulturali u li r-risposta tiegħu għall-kritika se tkun li jżid l-isforzi tiegħu.
“Se nwieġeb billi naħdem aktar,” qal il-Ministru.
Kontroversja dwar il-limiti tal-espressjoni artistika
Il-kummenti ta’ Agius Galea kienu qanqlu kritika wara li tkellem dwar il-ħtieġa li l-arti teżisti fi ħdan ċerti normi u li l-artisti jagħrfu d-differenza bejn it-tajjeb u l-ħażin.
Il-pożizzjoni tiegħu wasslet għal reazzjonijiet minn diversi artisti u organizzazzjonijiet, b’uħud minnhom jitolbu r-riżenja tiegħu.
Fost dawk li talbu li jwarrab hemm Studenti Graffitti, li sostniet li l-kummenti tiegħu juru nuqqas ta’ fehim tan-natura tas-settur kulturali u tal-importanza tal-libertà artistika.
Il-Partit Nazzjonalista, min-naħa tiegħu, qal li l-Ministru għandu jerfa’ r-responsabbiltà politika u jsewwi r-relazzjoni tiegħu mal-artisti, iżda mhux bilfors għandu jirriżenja.
Agius Galea issa qed jinsisti li se jibqa’ fil-kariga u jwieġeb għall-kritika permezz ta’ aktar ħidma.
.jpeg)
.png)
