Il-qtil ta’ Lassana Cisse seħħ fi sfond usa’ ta’ razziżmu istituzzjonalizzat u diskors li kontinwament ineħħi d-dinjità tal-migranti, sostnew għadd ta’ organizzazzjonijiet mhux governattivi fi stqarrija konġunta l-Ħamis.
L-organizzazzjonijiet laqgħu l-kundanna ta’ tmien snin ħabs mogħtija lil Lorin Scicluna għall-vjolenza motivata mir-razziżmu fil-konfront ta’ May Malimi, kif ukoll il-kundanna qawwija tal-Imħallef Natasha Galea Sciberras kontra l-imġiba razzista.
Madankollu, saħqu li wara l-ġrajjiet brutali tas-6 ta’ April 2019, kienu qed jistennew ħafna aktar mill-proċess ġudizzjarju.
Scicluna ġie kkundannat tmien snin ħabs wara li nstab ħati li darab gravi lil May Malimi f’inċident ta’ hit-and-run fl-1 ta’ Frar 2019.
Huwa kien illiberat mill-akkuża tal-qtil ta’ Lassana Cisse Souleymane u mill-attentati ta’ qtil ta’ Mohammed Jallow u Ibrahim Bah, li kienu sfaw fil-mira ta’ sparaturi f’Ħal Far fis-6 ta’ April 2019.
“Seba’ snin nistennew il-ġustizzja”
L-organizzazzjonijiet qalu li wara seba’ snin ta’ stennija għall-ġustizzja, it-tamiet tagħhom li l-proċess iwassal għal kundanna ċara ta’ Scicluna dwar il-qtil ta’ Cisse sfaxxaw.
Huma sostnew li dak li ddeskrivew bħala l-ippjanar metikoluż tal-kaċċa għall-bnedmin li seħħet dak il-lejl se jibqa’ mingħajr kastig.
Skonthom, il-verdett ma wassalx għall-kundanna qawwija li kienu qed jistennew kontra atti ta’ mibegħda u vjolenza razzjali.
L-organizzazzjonijiet iddeskrivew il-5 ta’ Novembru bħala jum ta’ mrar għal dawk kollha f’Malta li jemmnu fil-ġustizzja u fid-dinjità tal-bniedem.
Huma argumentaw li n-nuqqasijiet fis-sistema tal-prosekuzzjoni u tal-ġustizzja wasslu biex issir biss ġustizzja parzjali.
Kritika qawwija lill-Uffiċċju tal-Avukat Ġenerali
Fl-istqarrija tagħhom, l-organizzazzjonijiet ikkritikaw ukoll lill-Uffiċċju tal-Avukat Ġenerali, li akkużawh li ma ddedikax ir-riżorsi kollha meħtieġa għall-każ.
Huma ddeskrivew in-nuqqasijiet li jaraw fil-ħidma tal-Prosekuzzjoni bħala tal-mistħija u sostnew li dawn wasslu għal piena anqas severa għal persuna li huma jqisu bħala perikoluża.
Skonthom, il-mod kif tmexxa l-każ iqajjem mistoqsijiet serji dwar il-kapaċità tal-Prosekuzzjoni li tindirizza każijiet ta’ din il-gravità.
“Min se jerfa’ r-responsabbiltà għal din l-inġustizzja? Huwa ċar li s-servizzi tal-prosekuzzjoni f’Malta għandhom bżonn bidla radikali,” qalu l-organizzazzjonijiet.
“Min jipproteġi lill-ħaddiem Iswed li jkun sejjer id-dar billejl?”
L-istqarrija inkludiet ukoll reazzjoni ta’ Regine Nguini mill-African Media Association Malta, li qajmet mistoqsijiet dwar is-sigurtà tal-persuni Suwed li jgħixu f’Malta.
“Min jipproteġi lill-ħaddiem Iswed li jkun sejjer lura d-dar wara xift tard? Lill-istudent Iswed li jkun miexi waħdu billejl? Lill-mara Sewda li tkun qed tistenna fuq bus stop? Lit-tifel Iswed li qed jikber f’pajjiż li huwa wkoll daru?” staqsiet Nguini.
L-organizzazzjonijiet appellaw lill-pubbliku biex jirrifletti dwar xi jfisser il-verdett għal Lassana, May, Ibrahim u Mohammed, kif ukoll dwar il-konsegwenzi usa’ tal-vjolenza razzjali fuq is-soċjetà.
Huma talbu wkoll lill-awtoritajiet biex jeżaminaw bis-serjetà kemm il-Gvern għandu r-rieda u l-kapaċità li jipproteġi lil kull min jgħix f’Malta, irrispettivament mill-oriġini jew il-kulur tal-ġilda tiegħu.
Aktar minn 20 organizzazzjoni u individwu jiffirmaw l-istqarrija
Fost il-firmatarji tal-istqarrija hemm aditus foundation, African Media Association Malta, Men Against Violence, Blue Door Education, Drachma, Paulo Freire Institute Foundation, PEN Malta, Migrant Women Association Malta, Spark 15, The Daphne Caruana Galizia Foundation, Allied Rainbow Communities, Dance Beyond Borders Foundation, Women’s Rights Foundation, LGBTI Gozo, Malta LGBTIQ Rights Movement, Association for Justice, Equality and Peace, Moviment Graffitti, JRS Malta, Checkpoint Malta, il-Kunsill Nazzjonali taż-Żgħażagħ u Repubblika.
L-istqarrija ġiet iffirmata wkoll mill-Professuri tal-Università ta’ Malta Maria Pisani u Andrew Azzopardi.
