L-Awtorità tal-Ippjanar approvat applikazzjoni biex jiġu ssanzjonati estensjonijiet illegali li diġà saru fiż-żoo L-Arka ta’ Noè fis-Siġġiewi, kif ukoll biex jiġu awtorizzati faċilitajiet oħra fuq art barra miż-żona tal-iżvilupp (ODZ).
L-applikazzjoni, li tressqet minn Anton Caruana Cutajar, ġiet approvata unanimament b’disa’ voti favur u l-ebda wieħed kontra fil-5 ta’ Novembru, minkejja li parti kbira mill-iżvilupp kienet diġà twettqet mingħajr il-permessi meħtieġa.
Biex jiġu ssanzjonati l-irregolaritajiet, l-applikant se jkollu jħallas multa ta’ €31,869, flimkien ma’ kontribuzzjoni separata ta’ €25,000 bħala planning gain, li għandha tintuża għal proġetti ta’ titjib ambjentali fis-Siġġiewi.
B’kollox, iż-żewġ ħlasijiet jammontaw għal €56,869.
Ħadd ma ressaq oġġezzjoni għall-applikazzjoni, li ġġib in-numru PA/06369/25.
Aktar minn 3,000 metru kwadru ta’ gaġeġ
Fost l-istrutturi li se jiġu ssanzjonati hemm 3,134 metru kwadru ta’ gaġeġ għall-annimali tar-razzett, 2,000 metru kwadru ta’ żoni miftuħa għall-annimali, stalel, faċilità għall-ħażna tad-demel u parkeġġ għall-viżitaturi ta’ 1,300 metru kwadru.
Il-proposta tinkludi wkoll it-trasferiment tar-residenza tal-persuna responsabbli miż-żoo għal sit ġdid ta’ 1,075 metru kwadru.
Ir-residenza eżistenti, li kienet ġiet approvata bħala razzett fl-2018, se titwaqqa’ u tinbidel, filwaqt li l-kwartieri residenzjali attwali se jiġu kkonvertiti fi spazju għall-ħażna.
Id-Direttorat għall-Ġestjoni tal-Iżvilupp tal-Awtorità tal-Ippjanar iġġustifika l-estensjoni tal-ispazji għall-annimali bħala parti minn riorganizzazzjoni tas-sit, bil-għan li jinħolqu gaġeġ akbar, bi spazji adegwati bejniethom, u jittejbu l-kundizzjonijiet tal-benesseri tal-annimali.
Il-perit tal-proġett sostna li ż-żona kienet barriera fil-passat u li l-approvazzjoni se tgħin biex l-attività taż-żoo tibqa’ kkonċentrata f’żona waħda, minflok tkompli tinfirex fuq art fil-madwar.
Huwa argumenta wkoll li, meta mqabbel mas-sitwazzjoni attwali, il-proposta se tnaqqas l-art affettwata mill-iżvilupp billi tiġbor il-faċilitajiet fiż-żona ċentrali tas-sit.
Dubji dwar ir-residenza fiż-żona rurali
Il-parti residenzjali tal-proġett kienet inizjalment qajmet tħassib fi ħdan il-Kumitat Konsultattiv Agrikolu, li osserva li l-applikant ma kienx jikkwalifika għal residenza indipendenti skont il-politika tal-ippjanar rurali.
Madankollu, il-perit iċċara li l-applikazzjoni ma kinitx qed titlob permess għal abitazzjoni ġdida fil-kampanja, iżda għat-trasferiment ta’ kwartieri residenzjali li kienu diġà approvati bħala parti minn permess preċedenti taż-żoo.
Wara din il-kjarifika, il-kumitat irtira l-oġġezzjoni tiegħu.
Ir-residenza se tibqa’ marbuta strettament mal-operat taż-żoo, b’kundizzjoni proposta li tipprovdi li l-użu tagħha bħala abitazzjoni jintemm jekk jieqfu l-attivitajiet taż-żoo.
Fl-2018 l-ERA kienet wissiet dwar pressjoni għal aktar estensjonijiet
Iż-żoo kien oriġinarjament ġie ssanzjonat f’Ottubru 2018, permezz tal-permess PA/2477/16, minkejja l-oġġezzjonijiet tal-Awtorità għall-Ambjent u r-Riżorsi (ERA).
Dak iż-żmien, l-ERA kienet wissiet li l-approvazzjoni kienet se toħloq pressjoni prevedibbli għal aktar estensjonijiet fil-futur.
Il-permess tal-2018 kien jinkludi wkoll kontribuzzjoni ta’ €50,000 bħala planning gain.
Minkejja l-irregolaritajiet li issa ġew approvati, qatt ma kienet inħarġet ordni ta’ infurzar kontrihom.
Għall-aħħar applikazzjoni, l-ERA tat il-kunsens tagħha wara konsultazzjonijiet.
Transport Malta u l-konsulent tat-trasport tal-Awtorità tal-Ippjanar qiesu wkoll li ż-żieda fit-traffiku tal-viżitaturi kienet aċċettabbli, filwaqt li nnutaw li l-aċċess għall-pubbliku huwa prinċipalment limitat għal tmiem il-ġimgħa u l-festi pubbliċi.
