Il-President Amerikan Donald Trump ħassar il-pjan biex l-eżekuzzjoni ta’ Nidal Hasan, eks psikjatra tal-Armata Amerikana, tixxandar live.
Hasan, li fl-2009 qatel 13-il membru tal-militar Amerikan u darab madwar 32 oħra f’bażi militari f’Texas, għandu jiġi eżegwit minn skwadra tal-isparar fit-3 ta’ Diċembru 2026.
“Naħseb li x-xandir tal-eżekuzzjoni biex jaraha kulħadd seta’ jkun deterrent qawwi,” qal Trump fuq Truth Social il-Ħamis, filwaqt li sostna li dan kien juri kif l-Istati Uniti tittratta persuni bħal Hasan.
Il-ġimgħa li għaddiet, il-Pentagon kien ħabbar li l-eżekuzzjoni se tixxandar live, deċiżjoni li wasslet għal kritika qawwija fl-Istati Uniti u barra minnha, fosthom minn għaqdiet tad-drittijiet tal-bniedem.
In-Nazzjonijiet Uniti kienet iddeskriviet il-pjan bħala “abhorrent”, filwaqt li l-Viċi President JD Vance kien ukoll esprima dubji dwar jekk ix-xandira kellhiex issir. Huwa kien qal li, anke kieku saret, ma kienx se jaraha.
Trump qal li l-familji tal-vittmi xorta se jkunu jistgħu jaraw l-eżekuzzjoni personalment jekk jixtiequ, u qal li “jistħoqqilhom jaraw il-ġustizzja”.
L-eżekuzzjoni ta’ Hasan permezz ta’ skwadra tal-isparar mistennija tkun l-ewwel waħda tax-xorta tagħha f’aktar minn 60 sena.
Skont Amnesty International, aktar minn 2,700 eżekuzzjoni twettqu fi 17-il pajjiż matul is-sena li għaddiet. Eżekuzzjonijiet pubbliċi ġew irrappurtati f’żewġ pajjiżi biss, bi 11 fl-Iran u sitt oħra fl-Afganistan fl-2025.
Is-Segretarju tad-Difiża Amerikan Pete Hegseth kien iddefenda l-idea li l-eżekuzzjoni tixxandar, billi argumenta li n-nies għandhom jifhmu li hemm “konsegwenzi serji” għal atti bħal dawk li wettaq Hasan.
Hekk kif żdiedet il-kritika, Trump kien indika li d-deċiżjoni finali kienet għadha qed tiġi kkunsidrata mill-Pentagon, minkejja li qal li kien approva l-proposta.
Wara li Trump ħabbar li l-pjan ġie rtirat, kelliem għall-Pentagon ikkonferma lill-BBC li Hegseth kien tkellem mal-President qabel ittieħdet id-deċiżjoni.
John Galligan, l-avukat ta’ Hasan, qal lill-BBC li l-bidla fid-deċiżjoni ma ssorprendietux.
Huwa ddeskriva l-proposta oriġinali biex l-eżekuzzjoni tixxandar live bħala deċiżjoni ħażina u sostna li kienet tmur kontra r-regolamenti tal-Armata stess.
