L-MEP Franċiża Rima Hassan neħħiet bandiera Iżraeljana minn wirja fil-Parlament Ewropew fi Strasburgu, f’azzjoni ta’ protesta li wasslet lill-President tal-Parlament Roberta Metsola biex twissi li jistgħu jittieħdu passi fil-konfront tagħha.
Hassan, eletta mal-partit France Unbowed u membru tal-grupp tax-Xellug fil-Parlament Ewropew, ikkonfermat li kienet hi li neħħiet il-bandiera Iżraeljana minn fuq l-istand. Hija sostniet, madankollu, li l-bandiera tal-Unjoni Ewropea waqgħet biss minħabba li l-istruttura tilfet il-bilanċ, u insistiet li l-ebda waħda mill-bnadar ma ġarrbet ħsara.
L-inċident seħħ waqt wirja marbuta mat-tifkira tal-attakki tas-7 ta’ Ottubru 2023 fuq Iżrael.
Metsola qalet fil-plenarja li membru tal-Parlament kien deher f’filmati “apparentement jagħmel ħsara” lil wirja, billi tefa’ bandiera Iżraeljana mal-art u waqqa’ arblu, bil-bandiera tal-UE tispiċċa wkoll mal-art.
Hija qalet li l-każ qed jittieħed “b’serjetà kbira” u li se jittieħdu l-passi xierqa, filwaqt li l-MEP involuta tingħata d-dritt tippreżenta l-verżjoni tagħha.
Metsola argumentat li l-Parlament ma jistax jaċċetta ħsara lill-proprjetà jew azzjonijiet li jistgħu jiġu interpretati bħala intimidazzjoni.
Hija rreferiet ukoll għal dak li ddeskriviet bħala żieda fl-antisemitiżmu globali, u qalet li l-komunitajiet Lhud fl-Ewropa għandhom iħossu li l-Parlament huwa wkoll spazju sigur għalihom.
Hassan, min-naħa tagħha, wieġbet mill-plenarja li ma kinitx messet il-bandiera Ewropea u akkużat lil Metsola li għamlet dikjarazzjonijiet li, skontha, ma kinux fattwalment korretti.
Hija qalet li kienet kitbet ukoll lil Metsola biex tispjega l-verżjoni tagħha tal-inċident.
L-MEP iddefendiet id-deċiżjoni tagħha li tneħħi l-bandiera Iżraeljana, u qalet li l-protesta tagħha kienet kontra l-preżenza tal-Istat Iżraeljan f’avveniment organizzat fil-Parlament flimkien mar-rappreżentanza diplomatika tiegħu. Hija qabblet is-sitwazzjoni mal-wiri ta’ bandiera Russa fid-dawl tal-gwerra fl-Ukrajna.
Hassan sostniet ukoll li waqt l-avveniment kien hemm mappa li turi dak li sejħet “Greater Israel”, u allegat li persuni involuti fl-avveniment qalulha li l-Palestina u l-poplu Palestinjan ma jeżistux.
Dawn l-allegazzjonijiet huma parti mill-verżjoni ta’ Hassan dwar dak li seħħ.
Il-każ qajjem ukoll kritika minn MEPs oħra. Il-Viċi President tal-Parlament Ewropew Pina Picierno kienet fost dawk li kkritikaw l-azzjoni tagħha, filwaqt li l-MEP Franċiż François-Xavier Bellamy talab li tittieħed azzjoni dixxiplinarja.
Il-Presidenza tal-Parlament issa qed teżamina filmati tas-sigurtà biex tistabbilixxi eżattament x’ġara u jekk għandhiex tiġi imposta sanzjoni.
Ir-regoli tal-Parlament jippermettu diversi miżuri dixxiplinari għal ksur serju, fosthom ċanfira, sospensjoni ta’ allowances ta’ kuljum jew limitazzjoni temporanja ta’ ċerti attivitajiet parlamentari.
