Nathaniel Attard jitneħħa minn direttur tal-komunikazzjoni tal-PN

Nathaniel Attard ikkonferma li tneħħa mill-kariga ta’ direttur tal-komunikazzjoni tal-Partit Nazzjonalista, iżda ma riedx jidħol fid-dettall dwar id-deċiżjoni.

Attard ikkonferma li m’għadux jokkupa l-kariga u talab li kwalunkwe mistoqsija oħra dwar il-każ tiġi indirizzata lill-partit, meta ġie kkuntattjat minn MaltaToday.

Attard kien inħatar direttur tal-komunikazzjoni f’Settembru 2024, meta l-PN kien immexxi minn Bernard Grech. Huwa nżamm fl-istess kariga wara li Alex Borg sar Kap tal-Partit f’Settembru 2025.

Ir-raġunijiet wara d-deċiżjoni għadhom mhux magħrufa.

Madankollu, sorsi qrib il-partit qalu li Attard ġie infurmat f’daqqa li s-servizzi tiegħu ma kinux għadhom meħtieġa.

“It-tneħħija tiegħu kienet waħda f’daqqa,” qalu s-sorsi.

Attard għandu esperjenza twila fil-midja tal-Partit Nazzjonalista. Għal diversi snin ħadem bħala ġurnalist ma’ NET Television, qabel sar Kap tal-Aħbarijiet tal-istazzjonijiet tat-televiżjoni u r-radju tal-partit, kif ukoll editur tal-gazzetta In-Nazzjon.

Fl-2016 huwa kien telaq mill-PN biex jingħaqad ma’ BirdLife Malta bħala communications manager.

Huwa baqa’ mal-għaqda ambjentali sal-2024, meta rritorna mal-Partit Nazzjonalista biex jieħu f’idejh it-tmexxija tal-komunikazzjoni tal-partit.