“Aħna mhux pajjiż taż-żufjett” – Bedingfield jitlob li jiġi kkunsidrat it-tkeċċija tal-Estonjan

Il-Ministru għall-Intern Glenn Bedingfield qal li talab lill-Uffiċjal Prinċipali tal-Immigrazzjoni jikkunsidra t-tkeċċija ta’ raġel Estonjan marbut mal-inċident li fih persuna dehret għarwiena f’funtana fil-pjazza ta’ Ħaż-Żebbuġ.

“Dan il-qżież m’għandniex x’nambuh,” qal Bedingfield, filwaqt li żied: “Tlabt lill-Uffiċjal Prinċipali tal-Immigrazzjoni jikkunsidra t-tkeċċija ta’ dan ir-raġel Estonjan. Aħna mhux pajjiż taż-żufjett.”

Il-kummenti tiegħu jaslu wara li filmat li ċċirkola fuq il-midja soċjali wera raġel joħroġ għarwien mill-funtana fil-pjazza ta’ Ħaż-Żebbuġ, waqt li persuni fil-qrib kienu qed jiffilmjawh. Wara, ir-raġel deher jiġbor il-ħwejjeġ tiegħu minn mal-art u jitlaq minn fuq il-post. 

Il-Pulizija kienet qalet li ġiet infurmata bl-inċident għall-ħabta tal-11pm u li kienet qed teżamina filmati tas-CCTV biex tidentifika u ssib lir-raġel. 

Il-każ qajjem reazzjoni pubblika wara li l-filmat infirex online, u issa Bedingfield qal li qed jitlob li l-awtoritajiet tal-immigrazzjoni jeżaminaw jekk ir-raġel għandux jitkeċċa minn Malta.

S’issa għadu mhux magħruf jekk ittieħditx deċiżjoni dwar it-tkeċċija tiegħu.