L-Awtorità tal-Ippjanar, b’kollaborazzjoni ma’ Project Green, nediet it-tieni fażi ta’ konsultazzjoni pubblika dwar qafas propost għar-riġenerazzjoni tal-eks depot taż-żejt f’San Luċjan, Birżebbuġa.
Din il-fażi ssegwi t-tindif tat-tankijiet taż-żejt fis-sit aktar kmieni din is-sena. It-tankijiet kienu jintużaw għall-ħażna tal-Heavy Fuel Oil, bit-tindif tagħhom jimmarka pass importanti lejn ir-riġenerazzjoni taż-żona.
L-ewwel fażi ta’ konsultazzjoni saret aktar kmieni din is-sena, meta ġew ippreżentati l-viżjoni u l-għanijiet tal-gvern għas-sit. Matul dik il-fażi ġew sottomessi 18-il proposta u kumment minn residenti u diversi organizzazzjonijiet.
Bħala parti mill-konsultazzjoni attwali, qed tiġi proposta reviżjoni parzjali tal-Pjan Lokali ta’ Marsaxlokk tal-1995.
Ir-reviżjoni tipproponi li l-Policy ML05 eżistenti tiġi sostitwita b’qafas ġdid li jirregola l-iżvilupp fuq l-eks sit tad-depot, bil-għan li ż-żona tinbidel f’Ċentru għall-Innovazzjoni Sostenibbli.
Il-proġett huwa maħsub bħala ċentru għall-edukazzjoni, l-innovazzjoni u t-teknoloġija, flimkien ma’ spazji għal attivitajiet kulturali, divertiment u rikreazzjoni.
Il-pjanijiet jinkludu wkoll spazji ħodor miftuħa u aċċessibbli għall-pubbliku, kif ukoll faċilitajiet rikreattivi għall-familji, bil-għan li tinħoloq destinazzjoni sostenibbli li tagħti ħajja ġdida lil San Luċjan u sservi lill-komunità usa’.
L-abbozz tad-Development Brief jistabbilixxi qafas għall-iżvilupp tas-sit, fosthom parametri dwar l-użu tal-art, l-għoli tal-bini, id-disinn urban, il-landscaping, l-ispazji ħodor pubbliċi, il-mobbiltà sostenibbli u l-ħarsien tal-ambjent.
Il-qafas propost għandu wkoll l-għan li jipproteġi l-art agrikola tal-madwar, kif ukoll żoni fil-qrib li għandhom sensittività ekoloġika jew storika.
L-Awtorità tal-Ippjanar qed tistieden lill-pubbliku, stakeholders u partijiet interessati oħra biex iressqu l-fehmiet tagħhom dwar il-qafas propost.
Is-sottomissjonijiet jistgħu jsiru permezz tal-portal uffiċjali tal-konsultazzjoni pubblika, filwaqt li d-dokumenti relatati mal-proposta huma disponibbli fuq is-sit tal-Awtorità tal-Ippjanar.
Il-konsultazzjoni tibqa’ miftuħa sat-23 ta’ Settembru 2026.
